Ilon Mask 700 mlrd dollarlik boyligi bor birinchi odamga aylandi

Tesla kompaniyasiga oid yirik to‘lov paketi bo‘yicha sud qarori ortidan milliarder Ilon Mask dunyo tarixida ilk bor 700 milliard dollardan oshiq sof boylikka ega shaxsga aylandi. Forbes milliarderlar indeksiga ko‘ra, 20-dekabr kuni Maskning umumiy boyligi 749 milliard dollarga yetgan.

Bu o‘zgarish Delaver shtati Oliy sudi tomonidan 2018 yilda Tesla rahbari uchun tasdiqlangan, ammo keyinchalik bekor qilingan aksiyalar opsionlari qayta tiklanganidan so‘ng ro‘y berdi. Gap qiymati 139 milliard dollarga baholangan to‘lov paketi haqida bormoqda. Avvalroq quyi sud ushbu kompensatsiya shartnomasini «asossiz va tushunish qiyin» deb topib, bekor qilgan edi.

Oliy sud esa 2024 yilda qabul qilingan qaror Maskka nisbatan nohaq va adolatsiz bo‘lganini ta’kidlab, to‘lov paketini tiklashga qaror qildi. Natijada Tesla aksiyalari qiymati oshdi va Maskning shaxsiy kapitali keskin ko‘tarildi. Ushbu paket 56 milliard dollarlik maosh sxemasi asosida shakllangan bo‘lib, tarixdagi eng yirik korporativ rag‘batlantirish bitimlaridan biri hisoblanadi.

Bundan oldin, hafta boshida Mask o‘zining aerokosmik startapi SpaceX’ni ommaviy savdoga chiqarishi mumkinligi haqidagi xabarlar ortidan 600 milliard dollardan ortiq boylikka ega bo‘lgan birinchi inson sifatida qayd etilgan edi. Bu omil ham investorlar ishonchini yanada mustahkamladi.

Noyabr oyida Tesla aksiyadorlari Mask uchun qiymati 1 trillion dollargacha baholanayotgan yangi maosh rejasini ma’qulladi. Investorlar uning kompaniyani sun’iy intellekt va robototexnika sohasida global yetakchiga aylantirish strategiyasini qo‘llab-quvvatlayotganini bildirdi.

Forbes ma’lumotlariga ko‘ra, Maskning hozirgi boyligi dunyoning ikkinchi eng boy insonlaridan biri — Larri Peyj kapitaliga nisbatan qariyb 500 milliard dollarga ko‘p. Bu holat global biznes va texnologiya sohasidagi kuchlar nisbatida yangi bosqich boshlanganini ko‘rsatmoqda.