Путин 2027 йилгача тинчлик музокараларига шошилмайди — FT

Британиянинг «Financial Times» (FT) нашри ёпиқ дипломатик муҳокамаларга алоқадор Москвадаги манбасига таяниб хабар беришича, Россия 2027 йилнинг февралигача Украинадаги урушни якунлаш бўйича жиддий музокараларда қатнашмаслиги мумкин. Таъкидланишича, Путин 2026 йил охиригача бутун Донбасс ҳудудини эгаллашни мақсад қилган.

Бу муддат Россия президенти Владимир Путиннинг ўз армиясига 2026 йил охиригача Донецк вилоятининг қолган қисмини босиб олиш ҳақида берган буйруғи билан боғлиқ бўлиши мумкин.

Аввалроқ бу ҳақда Украина раҳбари Володимир Зеленский ҳам маълум қилган эди.

Қолаверса, Украина разведкаси маълумотларидан хабардор ва Россия раҳбарияти билан мулоқотда бўлган турли манбалар ҳам FT нашрига ушбу хабарни тасдиқлаган.

Россия АҚШдан Украинани ён беришга кўндиришни талаб қилмоқда

Нашрнинг муҳокамаларда қатнашган юқори лавозимли украиналик мулозимларга таяниб ёзишича, Россия делегацияси аввалги тинчлик музокараларида АҚШдан Украинанинг кенг кўламли ён беришларини таъминлашни талаб қилган.

Газета манбаларига кўра, ёз охиригача АҚШ иштирокидаги уч томонлама музокаралар қайта тикланмаслиги мумкин.

Россия томонининг бундай ён беришларни кутаётгани ҳақидаги маълумотни FT'нинг Москвадаги манбаси ҳам тасдиқлаган.

«Россияликлар учун ҳозирча америкаликлар уларга Украинани "қўшқўллаб топшириш" сценарийси маъқул вариант бўлиб қолмоқда. Уларнинг ўзлари эса бирор-бир ён беришга шаъма ҳам қилмаяпти ва фақат бир хил мақсадларни такрорлашдан тўхтамаяпти. Аслида, уларнинг музокаралардаги позицияси мулоқот учун ҳеч қандай асос йўқлигини англатади», – дейди манба.

Украина дронлар орқали «мисли кўрилмаган даражада» шиддатли зарбалар бермоқда

FT нашрининг ёзишича, Украина дронларининг Россия ҳудудларига бераётган «мисли кўрилмаган даражадаги шиддатли» зарбалари мамлакатда «сўнгги ўн йилликлардаги энг жиддий ёқилғи инқирози»ни келтириб чиқарган.

Полшанинг «Rochan Consulting» таҳлилий гуруҳи маълумотларига таянган нашрнинг қайд этишича, май ойида Киев Россиянинг нефтни қайта ишлаш заводларига (НҚИЗ) 16 марта муваффақиятли зарба берган. Бу эса бир ойлик кўрсаткич бўйича рекорд натижадир.

Умуман олганда, 2026 йил бошланганидан буён Россиядаги нефтни қайта ишлаш заводлари камида 194 марта ҳужумга учраган. Бу ўтган йилги кўрсаткичдан 11 баравар кўп.

Жорий йилда Киев ва Москва томонидан учирилган дрон ва ракеталар сони рекорд даражага етган. Икки давлат ўртасидаги узоқ масофали уруш 2022 йилнинг февралида Россиянинг кенг кўламли босқини бошланганидан буён энг юқори чўққисига чиққан.

Россия Мудофаа вазирлиги Украинанинг ҳужумкор дронларининг аксарияти ушлаб қолинаётганини таъкидламоқда. Бироқ зарбалар ва уларнинг оқибатлари шуни кўрсатмоқдаки, ҳужумлар сони ва миқёсининг кескин ошиши стратегик энергетика иншоотларига жиддий зарар етказмоқда.

Оқибатда мамлакат ҳудудларининг ярмидан кўпида ёқилғи савдосига қатъий чекловлар жорий қилинган, аҳоли эса ёқилғи қуйиш шохобчаларида соатлаб навбат кутишга мажбур бўлмоқда.

Россия Мудофаа вазирлиги маълумотларига кўра, 2026 йилнинг биринчи ярим йиллигида Россия ҳудуди ҳамда Украинанинг босиб олинган қисмларида 63 933 та Украина дрони уриб туширилган бўлиб, уларнинг тенг ярми сўнгги икки ой ҳиссасига тўғри келади. Таққослаш учун: январ ва феврал ойларида ҳар ойда энг кўпи билан 6 мингтадан дрон тутиб қолинган.

FT нашрининг таъкидлашича, ҳужумларда қўлланилаётган дронлар сонининг ортиши «Россиянинг ҳаво ҳужумидан мудофаа тизимига мисли кўрилмаган даражада босим ўтказиб, муҳим энергетика ва ҳарбий объектларни ҳимоя қилишни қийинлаштирмоқда».

Қайд этилишича, украин дронлари зарбаларининг аниқлигини оширишда АҚШ томонидан тақдим этилаётган разведка маълумотлари муҳим рол ўйнаган. Хусусан, юқори лавозимли украиналик мулозимларнинг FT нашрига маълум қилишича, Вашингтон Киевга дронлар парвози учун энг мақбул йўналишларни танлаш ҳамда душманнинг ҳаво ҳужумидан мудофаа тизимларини айланиб ўтишда ёрдам бермоқда.

Ушбу хулосалар шуни кўрсатадики, Киевнинг ҳаво ҳужумлари жадаллашуви Россия ҳаво мудофаа тизимига мисли кўрилмаган босим ўтказмоқда. Бу эса Москвага уруш машинасини таъминлаб турувчи муҳим энергетика ва ҳарбий иншоотларни ҳимоя қилишни қийинлаштирмоқда.

Бундан ташқари, дронлар ишлаб чиқариш ҳажмининг сезиларли даражада ошгани ҳамда уларни бошқариш тизимларининг такомиллашгани туфайли Украина зарбалар шиддатини оширишга муваффақ бўлган.

«Аслини олганда, Путин бу урушда яна бир ҳалокатли стратегик хатога йўл қўйгани кўриниб турибди. У қандайдир сабабларга кўра, вақт фақат ўз фойдасига ишлаяпти, деб ўйлади. Натижада Украинани таслим қила олмади, аксинча, уларга душман ичкарисига зарба берувчи қуролларни оммавий ишлаб чиқаришни йўлга қўйиш учун етарлича вақт бериб қўйди», – дейди Москвадаги Стратегия ва технологияларни таҳлил қилиш маркази директори Руслан Пухов.

Путин Донецкни тўлиқ босиб олишни буюрган

Россиянинг қуруқликдаги ҳужумлари секинлашиб, катта йўқотишларга сабаб бўлаётганига қарамай, Путин ўз қўшинларига йил охиригача Донецк вилоятининг қолган қисмини тўлиқ босиб олишни буюрган.

28 июн куни давлат телевидениесига берган интервюсида Путин Украинанинг зарбалари муайян «муаммолар» туғдираётганини тан олди, бироқ фронтда Россия қўшинлари ҳамон устунликка эга эканини айтди.

3 июл оқшомида Кремл жанг майдонидаги қўмондонлик пунктидан Путинга ҳисобот берилаётгани акс этган видеони эълон қилди. Видеода Россия Донбассдаги фронт чизиғида жойлашган Константиновка шаҳрини эгаллагани даъво қилинган.

Зеленский эса Путиннинг бу даъволарини рад этиб, шаҳарда жанглар ҳамон давом этаётганини билдирди.

Шу билан бирга, Россия Украинага зарба беришда ҳаво кучларига тобора кўпроқ таянмоқда; сўнгги ойларда ракета ва дрон ҳужумлари кўлами кескин ошган. Украина ҳукумати маълумотларига кўра, феврал ойидан буён мамлакат ҳудудига учирилаётган Россия ракеталари ва дронларининг умумий сони ойига 5 000 тадан ошмоқда.

2 июл куни Россия кучлари Киев томон 74 та ракета ва қарийб 500 та дрон учирди. Зеленскийнинг қайд этишича, ҳужум оқибатида 31 киши ҳалок бўлган, 90 дан ортиқ инсон жароҳатланган.