Tadbirkorlarga soliqda yengillik, Shavkat Mirziyoyevdan beshta tashabbus va Hindiston bilan imzolangan muhim bayonnoma — 29-may dayjesti

O‘zbekiston sun’iy intellektdan foydalanish darajasi past mamlakatlar qatoridan joy oldi

«Microsoft»ning «Global AI Diffusion Report» hisobotiga ko‘ra, 2026 yilning birinchi choragida O‘zbekistonda 15–64 yoshli aholining 7,2 foizi generativ sun’iy intellekt mahsulotlaridan foydalangan. Bu ko‘rsatkich jahon o‘rtacha darajasi bo‘lgan 17,8 foizdan ancha past bo‘lib, O‘zbekistonni sun’iy intellektdan foydalanish darajasi nisbatan past mamlakatlar qatoriga kiritgan.

Markaziy Osiyoda eng yuqori natija Qozog‘istonda (15,9 foiz), keyin Qirg‘izistonda (9,5 foiz) qayd etilgan. Jahon reytingida esa Birlashgan Arab Amirliklari 70,1 foiz bilan yetakchilik qilmoqda. Hisobot mualliflari sun’iy intellektning tarqalish sur’ati internet va elektr ta’minoti sifati, raqamli infratuzilma hamda aholining raqamli ko‘nikmalari bilan bog‘liq ekanini ta’kidlagan.

Global bozor sari yo‘l: O‘zbekiston va Hindiston o‘rtasida muhim bayonnoma imzolandi

O‘zbekiston Jahon savdo tashkilotiga a’zo bo‘lish jarayoni doirasida Hindiston bilan bozorga kirish masalalari bo‘yicha ikki tomonlama muzokaralarni yakunlab, tegishli bayonnomani imzoladi. Prezidentning JST bo‘yicha vakili Azizbek Urunovning ma’lum qilishicha, asosiy kelishuv 2024 yilda shakllangan bo‘lsa-da, hujjatni muvofiqlashtirish va texnik tekshiruvlar qo‘shimcha vaqt talab qilgan.

O‘zbekiston JSTga a’zo bo‘lish jarayonini 2026 yilda Kamerunda o‘tkazilishi rejalashtirilgan vazirlar konferensiyasiga qadar yakunlashni maqsad qilgan. So‘nggi ikki yilda mamlakat AQSH, Xitoy, Yaponiya, Buyuk Britaniya, Kanada, Avstraliya, Yevropa Ittifoqi davlatlari va boshqa qator hamkorlar bilan bozorga kirish bo‘yicha muzokaralarni muvaffaqiyatli yakunladi.

Umumiy ovqatlanish va savdo korxonalari uchun 6 foizlik QQS tartibi joriy etiladi

O‘zbekistonda 2026 yil 1-iyundan 2030 yil 1-yanvargacha umumiy ovqatlanish, savdo va xizmat ko‘rsatish sohalari uchun ixtiyoriy ravishda 6 foizlik soddalashtirilgan QQS tartibi joriy etiladi. Ushbu rejimni tanlagan tadbirkorlar uchun foyda solig‘i 0 foiz qilib belgilanadi va soliq hisobotini topshirish talabi bekor qilinadi.

Shuningdek, umumiy ovqatlanish korxonalariga to‘langan QQSning 40 foizi qaytarib beriladi, alkogol va tamaki mahsulotlari uchun naqd pul qabul qilishga ruxsat etiladi hamda xodimlarni soddalashtirilgan tartibda rasmiylashtirish imkoniyati yaratiladi. Yangi tartib kichik va o‘rta biznesni qo‘llab-quvvatlash hamda soliq ma’muriyatchiligini yengillashtirishga qaratilgan.

O‘zbekiston Prezidenti YOIIga beshta yangi tashabbusni ilgari surdi

Ostonadagi Oliy Yevroosiyo iqtisodiy kengashi yig‘ilishida Prezident Shavkat Mirziyoyev YOII bilan hamkorlikni kengaytirish bo‘yicha beshta tashabbusni ilgari surdi. Ular orasida yangi uch yillik hamkorlik dasturini qabul qilish, to‘siqlarsiz savdo uchun yagona raqamli makon yaratish, raqamli tranzit va «aqlli» transport-bojxona yo‘laklarini rivojlantirish takliflari bor.

Shuningdek, Prezident sanoat kooperatsiyasi uchun qo‘shma loyiha ofisi tashkil etish, «yashil» iqtisodiyot va sun’iy intellekt sohalarida qo‘shma dasturlar ishlab chiqish, mehnat migratsiyasi va turizm bo‘yicha hamkorlikni kengaytirishni taklif qildi. Tashabbuslar savdo, investitsiya, logistika va inson kapitali sohalarida hamkorlikni chuqurlashtirishga qaratilgan.

Endi 10 mln so‘mgacha QQS arizasiz qaytariladi, 500 mln so‘mgacha xavfda soliq auditi o‘tkazilmaydi

O‘zbekistonda kichik biznes uchun soliq ma’muriyatchiligini yengillashtirish bo‘yicha yangi tartiblar joriy etilmoqda. Prezident farmoniga ko‘ra, 2028 yil 1-yanvarga qadar soliq xavfi 500 million so‘mgacha bo‘lgan holatlarda soliq auditi, 100 million so‘mgacha bo‘lganda esa sayyor soliq tekshiruvlari o‘tkazilmaydi. Shuningdek, QQS to‘lovchisi guvohnomasini vaqtincha to‘xtatib turish amaliyoti bekor qilinadi.

2026 yil 1-iyundan boshlab 10 million so‘mgacha bo‘lgan QQS bo‘yicha salbiy farq summalari ariza va tekshiruvlarsiz avtomatik tarzda qaytariladi. Bundan tashqari, importchilarni majburiy ravishda QQS to‘lovchisi sifatida ro‘yxatga olish tartibi bekor qilinib, bank hisobvaraqlari bo‘yicha operatsiyalarni qayta faollashtirish jarayoni ham avtomatlashtiriladi.