Абитуриентларнинг 37 фоизидан кўпроғи минимал балл тўплай олмаган
Якуний танлов натижаларига кўра, давлат гранти асосида ўртача ўтиш бали 134,6 балл, тўлов-контракт асосида эса 93,7 баллни ташкил этди. Ўтган ўқув йилида мазкур кўрсаткичлар мос равишда 121,8 ва 84,9 балл бўлган.
© gov.uzЖорий йилги кириш имтиҳонларида 233 935 нафар абитуриент 56,7 баллдан паст натижа қайд этди. Бу умумий абитуриентлар сонининг 37,54 фоизини ташкил қилди.
Бу ҳақда 18 август куни Олий таълим, фан ва инновациялар вазирлигида 2026–2027-ўқув йили учун олий талим муассасаларига қабул жараёнларининг якуний натижаларига бағишланган матбуот анжуманида вазирнинг биринчи ўринбосари Сардор Ражабов маълум қилди, дея хабар берди Vaqt.uz мухбири.
Жорий ўқув йили учун олий таълим муассасаларига кириш мақсадида 677,9 минг нафар абитуриент онлайн рўйхатдан ўтди. Уларнинг 389,1 минг нафари 56,7 баллдан юқори натижа қайд этиб, танловда иштирок этиш ҳуқуқини қўлга киритди.
Иккинчи босқичда абитуриентлар ўз тўплаган баллидан келиб чиқиб, олийгоҳ, таълим йўналиши ва таълим шаклини танлади. Натижада 357,6 минг нафар абитуриент ўз танловини амалга оширди.
Якуний мандат натижаларига кўра, бакалавриат таълим йўналишларига 209,1 минг нафар абитуриент талабаликка тавсия этилди. Улардан 52,8 минг нафари давлат гранти, 156,3 минг нафари эса тўлов-контракт асосида ўқиш имкониятига эга бўлди.
Ўртача баллар ўсмоқда
Сардор Ражабовнинг маълум қилишича, бу йил давлат гранти асосида ўқишга тавсия этилган абитуриентларнинг ўртача балли 134,6 ни ташкил этди. Тўлов-контракт асосида қабул қилинганларда эса ўртача кўрсаткич 93,7 балл бўлди.
Шунингдек, белгиланган имтиёзлар бўйича алоҳида қабул кўрсаткичлари доирасида яна 20,5 минг нафар абитуриент талабаликка қабул қилинди.
Расмий статистикага кўра, минимал баллга ета олмаганлар улушининг 46 фоиздан 37,54 фоизгача қисқариши қабул имтиҳонларида паст натижа кўрсатаётганлар сони камайиб бораётганини кўрсатади. Жумладан, бу кўрсаткич 2025 йилда 41 фоиз, 2024 йилда 43 фоиз, 2023 йилда эса 46 фоизни ташкил этган. Бироқ ҳали ҳам ҳар уч абитуриентдан биттасидан кўпроғи белгиланган минимал чегарадан ўта олмаган.
Вазирлик маълумотларига кўра, бу йил абитуриентлар орасида энг катта талаб Тошкент давлат иқтисодиёт университети, Ўзбекистон давлат жаҳон тиллари университети ва Ўзбекистон Миллий университетига тўғри келган.
Йўналишлар кесимида эса «Даволаш иши» етакчилик қилган. Шунингдек, «Иқтисодиёт» ҳамда «Филология ва тилларни ўқитиш: инглиз тили» йўналишлари ҳам абитуриентлар томонидан энг кўп танланган йўналишлар қаторидан жой олган.
