АҚШ Эронга учинчи авиаташувчи кемасини юборди: улар Эрон нефтини «тортиб олмоқчи»
Минтақага «George H.W. Bush» учинчи авиаташувчи гуруҳи юборилиши фонида АҚШ расмийлари Теҳроннинг энергия ресурслари устидан бошқарув ўрнатилишини очиқ эълон қилмоқда.
АҚШ Энергетика устуворлиги бўйича миллий кенгаш директори Жаррод Эйген «Fox Business» телеканалига берган интервюсида Вашингтон Эрон нефт захираларини назорат остига олишни режалаштираётганини билдирди.
«Бизнинг мақсадимиз — Эрондаги улкан нефт захираларини террорчилар қўлидан тортиб олиш», — деди президент ёрдамчиси ўринбосари лавозимида фаолият юритувчи Эйген.
Унинг таъкидлашича, бу Ҳўрмуз бўғози орқали етказиб бериладиган нефт билан боғлиқ хавфларни бартараф этиш имконини беради.
Оқ уй вакили ўз сўзларига исбот сифатида Венесуэла мисолини келтирди. Унинг сўзларига кўра, АҚШ ҳаракатлари натижасида Венесуэлада нефть қазиб олиш ҳажмини тез фурсатда оширишга эришилган. Хусусан, Американинг «Chevron» компанияси атиги икки ой ичида у ерда ишлаб чиқариш бўйича рекорд натижага чиққан. Ушбу баёнотлар АҚШ Ҳарбий-денгиз кучлари учинчи авиаташувчи гуруҳини Яқин Шарққа юборишга тайёрлигини эълон қилган пайтда янгради.
Ҳарбий кучларнинг сафарбар этилиши
5-март куни «USS George H.W. Bush» авиаташувчи кемаси ва унинг ҳамроҳлигидаги ҳарбий кемалар ҳамда учоқлар гуруҳи «миллий миқёсдаги миссияларда» иштирок этиш учун зарур бўлган машғулотларни якунлади. Феврал ойи бошида Виржиния қирғоқларида бўлган ушбу авиаташувчи гуруҳ энди Яқин Шарқ минтақасига ўтказилишини кутмоқда.
Ҳозир минтақада АҚШнинг «Abraham Lincoln» ва «Gerald R. Ford» авиаташувчи кемалари бошчилигидаги иккита зарбдор гуруҳи ҳаракат қилмоқда. «USNI News» ва «Marine Tracker» маълумотларига кўра, биринчи гуруҳ Арабистон денгизида, иккинчиси эса Қизил денгизда жойлашган. Учинчи гуруҳнинг келиши АҚШнинг минтақадаги ҳарбий иштирокини янада кучайтиради.
Стратегик мақсадлар
«The Wall Street Journal» нашрининг ёзишича, «George H.W. Bush» кемасига Яқин Шарққа жойлашиш ҳақидаги буйруқ феврал ойи бошидаёқ берилган эди. Вашингтоннинг бундай ҳаракатлари Эроннинг энергия ресурсларини назорат қилиш ва минтақадаги ҳарбий устунликни таъминлашга қаратилган.
Бугунга келиб АҚШ нафақат ҳарбий босимни оширмоқда, балки Эроннинг иқтисодий асоси бўлган нефт секторини қайта тақсимлаш бўйича ўз режаларини очиқ баён этмоқда. Бу эса Яқин Шарқдаги кескинликни янги босқичга олиб чиқиши ва глобал энергия бозорига жиддий таъсир кўрсатиши мумкин.
