Трамп криптовалютасини харид қилганлар миллиардлаб доллар зарар кўрди
«TRUMP» мемкоини атрофидаги шов-шув катта йўқотишларга айланди. Таҳлилларга кўра, қарийб бир миллион инвестор маблағидан айрилган.
© binance.comАҚШ президенти Доналд Трамп номи билан боғлиқ «TRUMP» мемкоинини харид қилган қарийб бир миллион киши зарар кўрди. «The New York Times» нашри «Nansen» таҳлилий компанияси маълумотларига таяниб, умумий йўқотишлар 3,81 миллиард долларга етганини хабар қилди.
Ҳисоботга кўра, 3 июл ҳолатида токен нархи 1,76 доллар атрофида савдо қилинган. Бу унинг аввал қайд этилган энг юқори кўрсаткичи — 75,35 доллардан қарийб 97 фоизга паст дегани.
2024 йилги сайловларда Трампни қўллаб-қувватлаган криптотрейдер Николас Пинто ҳам зарар кўрганлар орасида бўлган. У «TRUMP» мемкоинига қарийб ярим миллион доллар киритгани ва маблағининг ярмидан айрилганини маълум қилган.
Мемкоин қандай қулади?
«The New York Times» нашрининг ёзишича, «TRUMP» токени савдога чиқарилганидан кейин кескин қимматлашган. Унинг нархи қисқа вақт ичида бир доллардан камроқ кўрсаткичдан 70 доллардан юқорига кўтарилган.
Бироқ профессионал трейдерлар ва автоматлаштирилган савдо ботлари дастлабки ўсишдан фойдаланиб, активларни юқори нархда сотган. Кейинроқ бозорга кирган тажрибасиз инвесторлар эса нарх тушиши оқибатида асосий зарарни кўрган.
«Nansen» таҳлилларига кўра, 988 905 та криптоҳамён эгаси – яъни мемкоин харид қилган ҳар уч кишидан қарийб иккитаси пулидан айрилган. Уларнинг умумий зарари (токенларини ҳанузгача сақлаб турганларнинг қоғоздаги йўқотишларини ҳам қўшиб ҳисоблаганда) 3,81 миллиард долларни ташкил этади.
Шу билан бирга, 500 мингга яқин ҳамён эгаси савдодан умумий ҳисобда 4 миллиард доллар атрофида даромад олган.
Трампнинг даромадлари
Нашрнинг таъкидлашича, токен нархи кўтарилган ёки тушганидан қатъи назар, унинг савдоси Трамп билан боғлиқ тузилмаларга даромад келтирган. Сабаби ҳар бир операциядан комиссия олинган.
АҚШ Ҳукумат этикаси бошқармаси эълон қилган молиявий ҳисоботга кўра, Трампнинг криптовалюта билан боғлиқ умумий даромади 1 миллиард доллардан ошган. Ҳуқуқшунослар эса келажакда мемкоин билан боғлиқ ҳолат юзасидан жамоавий даъволар пайдо бўлиши мумкинлигини истисно қилмаяпти.
