19-июлдан бошлаб Қозоғистонда ягона QR-код тўлов тизими ишга туширилади

Қозоғистон Миллий банки Молия бозорини тартибга солиш ва ривожлантириш агентлиги билан биргаликда Олмаотада иккинчи даражали банклар ва Қозоғистон молиячилари ассоциацияси раҳбарлари билан учрашув ўтказди.

Тадбир давомида томонлар иккинчи даражали банкларнинг Банклараро мобил тўлов тизимидаги иштироки ҳолатини, шунингдек, мобил ўтказма ва QR тўлов хизматларини жорий этиш бўйича кейинги қадамларни муҳокама қилишди. Ягона QR тизимини босқичма-босқич оммалаштиришни жорий йилнинг 7 июлида бошлаш ва уни 2026-йил 19-июлда тўлиқ ишга тушириш тўғрисида қарор қабул қилинди.

Иккинчи даражали банкларнинг рақамли активлар бозори иштирокчилари билан ўзаро муносабатларига, рақамли тенгедан фойдаланишга ва банкларга давлат ахборот хизматларидан фойдаланишни таъминлаш тартибига ёндашувларни такомиллаштиришга алоҳида эътибор қаратилди. 

Учрашув якунида иштирокчилар муҳокама қилинган масалалар бўйича фикр алмашдилар ва уларни амалга оширишда ҳамкорликни давом эттиришга тайёр эканликларини билдирдилар.

Эслатиб ўтамиз, 2026-йил 1-январдан Ўзбекистонда электрон тўловлар инфратузилмасини янгилаш ва ягона стандартни жорий этиш мақсадида барча савдо ва хизмат кўрсатувчи юридик шахслар учун ягона QR-код жорий этилганди. Жорий йилнинг 1-июлидан эса ушбу тизим орқали тўлов қабул қилиш мажбурий талабга айланди.