АҚШ ва Куба 10 йил ичида илк бор Ҳаванада махфий музокаралар ўтказди

АҚШ Давлат департаменти делегацияси ўтган жума куни Куба ҳукумати билан музокаралар ўтказиш учун Ҳаванага борди. «Axios» нашри манбаларига кўра, бир қатор учрашувлар, жумладан, мамлакатда ҳамон катта сиёсий таъсирга эга бўлган собиқ президент Раул Кастронинг набираси Раул Гилермо Родригес Кастро билан ҳам мулоқотлар бўлиб ўтган.

Америка томони Куба иқтисодиёти «жарга қулаётганини» таъкидлаб, вазият ортга қайтмас даражада ёмонлашмасидан олдин орол раҳбариятини АҚШ кўмагида демократик ва иқтисодий ислоҳотлар ўтказишга чақирди.

Давлат департаменти вакиллари сиёсий маҳбусларни озод қилиш ҳамда 1959-йилги инқилобдан сўнг мусодара қилинган АҚШ фуқаролари ва корпорацияларининг активлари учун товон пули тўлашни қатъий талаб қилди. Шунингдек, АҚШ чегарасидан юз милдан камроқ масофада хорижий разведка, ҳарбий ва террорчи гуруҳларнинг фаолият юритаётганидан жиддий хавотир билдирилди.

Бу талаблар бажарилган тақдирда, Вашингтон савдо эмбаргосини бекор қилиш масаласини муҳокама қилишга ва Илон Маскнинг «SpaceX» компаниясига тегишли «Starlink» сунъий йўлдош алоқасидан фойдаланиш имкониятини яратиб беришга ваъда қилди.

Қайд этиш жоизки, бу АҚШ ва Куба ўртасида сўнгги ўн йил ичида ўтказилган илк музокаралардир. Охирги марта мамлакатлар 2016 йилда Барак Обаманинг ташрифи чоғида тўғридан тўғри мулоқот қилган эди.

Қамал ва яширин режалар

2026-йил бошида АҚШ Кубани амалда ёнилғи қамалига олганди. Президент Доналд Трамп оролдан келаётган «миллий хавфсизликка таҳдид»ни рўкач қилиб, Ҳаванага нефт етказиб берувчи давлатларга қўшимча божлар жорий қилди. Бу эса Кубада оғир энергетика инқирозини келтириб чиқарди.

«The Wall Street Journal» нашрининг хабар беришича, Раул Кастронинг набираси дипломатик каналларни четлаб ўтиб, Трампга махфий хат юборишга уринган. Оқ уйдаги манбаларнинг таъкидлашича, Куба Эрон ва Венесуэладан кейин «Трампнинг навбатдаги нишони» бўлиши мумкин.

Агар Ҳавана келишувни рад этса, АҚШ президенти оролни «дўстона босиб олиш» эҳтимолини ҳам инкор этмаган. Вашингтон 1991-йилгача оролни қўллаб-қувватлаган совет иттифоқининг ўрнини эгаллаб, Кубани АҚШга молиявий жиҳатдан тўлиқ қарам қилиш режасини ишлаб чиққани айтилмоқда.