АҚШ Хитойни огоҳлантирди
АҚШ Давлат департаменти Пекинни Тайван атрофидаги ҳарбий машғулотларни тўхтатишга чақирди.
АҚШ маъмурияти расмий Пекинни Тайванга нисбатан ҳарбий босим ўтказишни зудлик билан тўхтатишга ва минтақавий кескинликни юмшатиш учун конструктив мулоқотга киришишга чақирди.
Давлат департаментининг баёнотида таъкидланишича, Хитойнинг Тайван ва минтақадаги бошқа давлатларга нисбатан ҳарбий ҳаракатлари ҳамда риторикаси кескинликни асоссиз равишда оширмоқда. Вазирлик Пекинни вазминлик кўрсатишга ҳамда куч ишлатиш ёки мажбурлаш орқали мавжуд статус-квони бир томонлама ўзгартиришга уринишлардан воз кечишга чақирган.
АҚШ ташқи сиёсат маҳкамаси Тайван бўғозида тинчлик ва барқарорликни қўллаб-қувватлашини, ҳар қандай тажовузкор ҳаракатларга қарши эканини расман билдирди. Ушбу баёнот Хитой армияси Тайван ороли атрофидаги сув ва ҳаво ҳудудида «Адолат миссияси - 2025» деб номланган кенг кўламли ҳарбий машғулотларини якунлаганидан сўнг эълон қилинди.
Хитой томонидан ўтказилган ушбу машғулотлар давомида жанговар ўқ отишлар амалга оширилган ва оролнинг муҳим портларини блокада қилиш амалиётлари синовдан ўтказилган. Бундай ҳаракатлар минтақавий хавфсизликка таҳдид сифатида баҳоланмоқда, бироқ АҚШ Президенти Дональд Трамп вазиятга нисбатан анча хотиржам муносабатда бўлмоқда.
Душанба куни Президент Трамп журналистлар билан суҳбатда Пекиннинг машғулотлари уни хавотирга солмаётганини таъкидлади. У Хитой раиси Си Жинпинг билан аъло даражадаги муносабатларга эга эканини ва суҳбат давомида бу масала кўтарилмаганини билдирган. Трамп, шунингдек, Хитойнинг оролга бостириб киришига ишонмаслигини қўшимча қилган.
