Британия 2018 йилда Скрипалларни заҳарлашни шахсан Путин буюрганини таъкидламоқда
Лондондаги тергов комиссияси 2018 йилда содир бўлган разведкачи Скрипал ҳодисаси учун буйруқ тўғридан тўғри Владимир Путин томонидан берилгани ҳақида шак-шубҳасиз хулоса чиқарди.
Буюк Британия Россия президенти Владимир Путин 2018 йилда Сергей Скрипални заҳарлашни буюрганини таъкидлаган ҳисоботни эълон қилди, деб ёзади BILD нашри.
Буюк Британия тергов комиссияси ўз ҳисоботида Россия президенти Владимир Путин 2018 йилда собиқ россиялик разведкачи Сергей Скрипалга қарши асаб тизимини фалажловчи модда қўллашни буюргани ҳақида маълум қилди.
Ҳисоботда таъкидланишича, ҳужумни айнан Россия амалга оширганига доир далиллар «шак-шубҳасиз». Шунингдек, «бепарволик билан куч ишлатиш» оқибатида бегона аёл қурбон бўлгани қайд этилган.
2018 йил март ойида Сергей Скрипал ва унинг қизи Юлия Англиянинг жанубидаги Солсбери шаҳрида жойлашган боғдаги ўриндиқда ҳушсиз ҳолда топилган эди. Бу ҳодиса уларнинг уй эшиги тутқичига «Новичок» моддаси суртилганидан сўнг юз берган.
Тахминан тўрт ой ўтгач, 44 ёшли Доун Стержесс вафот этди. Бу воқеа унинг ҳамроҳи россиялик агентлар заҳарни мамлакатга олиб кириш учун ишлатган сохта атир идишини топганидан сўнг юз берди. Скрипал ва унинг қизи эса тирик қолган.
Тергов комиссияси раиси ва Олий суднинг собиқ судяси Энтони Ҳюз Скрипални ўлдирмоқчи бўлган гуруҳ ГРУ (Бош разведка бошқармаси) зобитларидан иборат эканига қатъий ишонч билдирди.
«Мен Сергей Скрипални ўлдириш операцияси энг юқори даражада — президент Путин томонидан тасдиқланган бўлиши керак, деган хулосага келдим», — дейилади ҳисоботда.
Шундан сўнг Британия ҳукумати ГРУга қарши янги чекловлар жорий этди ва Россия элчисини чақиртирди.
«Бирлашган Қироллик ҳар доим Путиннинг шафқатсиз режимига қарши туради ва унинг ўлим машинасини ўз номи билан атайди», — деди Буюк Британия бош вазири Кийр Стармер.
Россиянинг Лондондаги элчихонаси ҳозирча бу борада изоҳ бермади.
Эслатиб ўтамиз, 2018 йилда Буюк Британия ҳукумати раҳбари Тереза Мэй Россияни Сергей Скрипал ва унинг қизига суиқасд уюштиришда айблаган эди. Ўшанда Россия ҳукумати бу айбловларни рад этган.
Ўша йили Мэй халқаро можаро сабабли на британиялик амалдорлар, на қироллик оиласи аъзолари 2018 йили Россияда ўтган Жаҳон чемпионатига бормаслигини маълум қилган эди.
