Эрон Исроилнинг иккита шаҳрига ракета зарбалари берди
Эрон томонидан 21 март куни кечқурун Исроилнинг Димона ва Арад шаҳарларига берилган ракета зарбалари натижасида 100 дан ортиқ киши жароҳатланди.
Эрон давлат телеканаллари маълум қилинишича, ушбу ҳужумлар Натанздаги уранни бойитиш мажмуасига қилинган зарбага жавоб сифатида баҳоланган. Зарба пайтида ҳар икки шаҳарда ҳам мудофаа тизимлари ракеталарни тўлиқ тўсиб қола олмаган.
Арад шаҳрида ракетанинг тўғридан-тўғри тушиши оқибатида тўққизта турар жой биноси вайрон бўлган ва шаҳар марказига жиддий зарар етган. Фавқулодда хизматлар маълумотига кўра, бу ерда камида 88 киши жароҳатланган, улардан 10 нафарининг аҳволи оғир. Жиддий жароҳат олганлар орасида беш ёшли бола ҳам бор.
Димонада эса 12 тагача зарба қайд этилган бўлиб, улардан бири турар жой биносига тушган. Бу ерда 50 дан ортиқ киши жароҳат олгани айтилмоқда. Ҳозирча ҳар икки шаҳарда ҳалок бўлганлар ҳақида расмий маълумот берилмаган.
Исроил муносабатлари
Исроиллик ҳарбий журналист Сергей Ауслендерга кўра, вайронагарчилик кўлами катта бўлишига қарамай, қурбонлар йўқлиги «мўъжиза» сифатида баҳоланмоқда. Унинг таъкидлашича, тутувчи ракета тизими айрим ҳолатларда нишонга аниқ тегмаган.
MAGATE агентлиги Димонадаги Шимон Перес номидаги ядровий тадқиқот марказига зарар етмаганини ва радиация даражаси ўзгармаганини маълум қилди. Агентлик раҳбари Рафаэл Гросси ядровий объектлар атрофида ҳарбий ҳаракатларда эҳтиёткорликка чақирган.
Исроил бош вазири Бинямин Нетаньяху ушбу ҳужумни мамлакат учун «оғир кеча» деб атаб, Эронга қарши ҳаракатлар давом эттирилишини билдирган. Шу билан бирга, таълим муассасаларида анъанавий дарслар вақтинча бекор қилинди.
