FIFA Ўзбекистонга 25 млн доллар ажратмоқчи

Халқаро футбол федерацияси (FIFA) ўз аъзоси бўлган 211 та миллий футбол ассоциациясининг ҳар бирига тўрт йил давомида ажратиладиган маблағни 25 миллион долларгача оширишни кўриб чиқмоқда. Янги режа FIFA президенти Жанни Инфантино ва Европа футболи раҳбарлари ўртасида келишмовчиликлар давом этаётган бир пайтда муҳокама қилинмоқда.

FIFA миллий футбол федерацияларини молиялаштириш учун умумий қиймати 6,35 миллиард долларлик янги дастурни тайёрламоқда. Таклифга кўра, кейинги тўрт йиллик даврда ташкилотга аъзо 211 та федерациянинг ҳар бирига ажратиладиган маблағ 10 миллион доллардан 25 миллион долларга оширилиши мумкин.

AP агентлигининг вазиятдан хабардор икки манбага таяниб хабар беришича, FIFA қўшимча харажатларни АҚШ, Канада ва Мексикада ўтказилган футбол бўйича жаҳон чемпионатидан тушган даромадлар ҳисобидан қоплашни режалаштирмоқда.

Ташкилот ҳисоб-китобларига кўра, 2022–2026-йилларни ўз ичига олган тўрт йиллик даврдаги умумий даромад тахминан 15 миллиард долларга етади. Манбаларнинг айтишича, бу дастлабки кутилмалардан анча юқори.

Маблағларни тақсимлашнинг янги тартиби қитъавий футбол конфедерациялари раҳбарлари билан муҳокама қилинмоқда. 28-сентябр куни FIFA президенти Жанни Инфантино олтита қитъавий конфедерация раҳбарига мактуб йўллаб, миллий федерацияларга молиявий ёрдамни оширишни таклиф қилган.

«Сизнинг таклифларингиз FIFA’нинг молиявий муваффақияти футбол ва ташкилотга аъзо бўлган 211 та федерация манфаатларига хизмат қилиши керак, деган асосий мақсад борасида кенг якдиллик мавжудлигини тасдиқлайди», — дейилади мактубда.

Инфантино, шунингдек, биргаликдаги саъй-ҳаракатлар орқали дунёнинг барча минтақаларида футболни барқарор молиялаштириш имкони пайдо бўлишига ишонч билдирган.

Янги режани дастлаб FIFA кенгаши кўриб чиқиши, кейин эса 2027-йилнинг март ойида ташкилот конгресси тасдиғига киритилиши кутилмоқда. Миллий футбол федерациялари учун маблағнинг кўпайиши футболчилар тайёрлаш, болалар ва ўсмирлар футболига сармоя киритиш ҳамда спорт инфратузилмасини ривожлантириш учун қўшимча имконият яратиши мумкин. Бироқ ажратилган пулларни ишлатиш шартлари ҳозирча тўлиқ маълум қилинмаган.

FIFA раҳбарияти учун мураккаб давр

Маблағларни кўпайтириш таклифи FIFA раҳбарияти атрофидаги келишмовчиликлар кучайган бир пайтда илгари сурилмоқда. Жанни Инфантино FIFA президенти лавозимига тўртинчи муддатга сайланишни режалаштирмоқда. Бироқ жаҳон чемпионатининг тижорий ҳуқуқлари бўйича юзага келган баҳсдан кейин унинг айрим қитъавий конфедерациялар билан муносабатлари ёмонлашган.

Ёзда жаҳон чемпионатига тегишли тижорий ҳуқуқларни хусусий инвесторларга сотиш ташаббуси келишмовчиликларга сабаб бўлган. Учта қитъавий конфедерация вакиллари бу таклифни мақбул эмас деб ҳисоблаган. Европа футбол ассоциациялари иттифоқи (UEFA) эса FIFA президентига бўлган ишонч йўқолганини бир неча бор билдирган.

Август ойида UEFA эҳтимолий битим доирасида молиявий бошқарув қоидалари бузилган бўлиши мумкинлиги юзасидан Швейцарияда жиноий шикоят киритишга тайёрланаётганини маълум қилган. Шунингдек, ташкилот далилларни тўплашга рухсат олиш учун АҚШ судларига мурожаат қилган.

Шу шароитда Европа футболи раҳбарлари FIFA президенти сайловида Инфантинонинг ўрнига бошқа номзодни илгари суриш имкониятини ҳам муҳокама қилмоқда.

UEFA таркибига 55 та миллий футбол ассоциацияси киради. Бу FIFA аъзоларининг чорак қисмидан кўпроғини ташкил этади. Улар президент сайловида овоз бериш ҳуқуқига эга. Сайлов 2027-йил 18-март куни Марокаш пойтахти Работ шаҳрида ўтказилиши белгиланган. Инфантинонинг эҳтимолий рақиблари ўз номзодларини 18-ноябрга қадар кўрсатишлари керак.

Ўтган ойда FIFA’нинг амалдаги президенти ташкилот бошқарув тизимини мустақил текширувдан ўтказишга ва эҳтимолий ислоҳотларни кўриб чиқишга тайёрлигини билдирган.

AP манбалари хабар беришича, қитъавий конфедерациялар янги дастурни молиялаштириш учун FIFA захираларидан ҳам фойдаланишни таклиф қилган. Ҳозирги режага кўра, олтита қитъавий конфедерациянинг ҳар бирига 99 миллион доллардан ажратилиши кўзда тутилган.

Шундай қилиб, миллий футбол федерацияларига ажратиладиган маблағни рекорд даражада ошириш масаласи FIFA президенти сайловига тайёргарлик ва ташкилот молиясини бошқариш бўйича давом этаётган келишмовчиликлар билан бир вақтда муҳокама қилинмоқда. Янги молиявий ёрдам дастури бўйича ҳозирча якуний қарор қабул қилинмаган.

Эслатиб ўтамиз, аввалроқ Ўзбекистон миллий терма жамоаси бош мураббийи Каннаваронинг маоши ва футболдан ташқари бизнеслари ҳақида ёзган эдик.