Кредит ундирилганда картада камида 680 минг сўм қолдирилиши мумкин

Марказий банк бошқаруви банк хизматлари истеъмолчилари билан ишлашда тижорат банкларига қўйиладиган минимал талабларнинг 35¹-бандига қўшимча киритишни таклиф қилмоқда.

Лойиҳага кўра, банкларга кредит ёки кафиллик тўловларини мижознинг топшириғисиз унинг барча банк карта ҳисобварақларидан ундираётганда, уларда меҳнатга ҳақ тўлашнинг энг кам миқдорининг ярмича маблағни сақламасдан пул ечиб олиш тақиқланади.

Ўзбекистонда 1 сентябрдан МҲТЭКМ 1 млн 360 минг сўмни ташкил этади. Шундан келиб чиқиб, карталарда сақланиши керак бўлган маблағ ҳозирги миқдор бўйича 680 минг сўмга тенг бўлади. МҲТЭКМ ўзгарса, ушбу чегара ҳам унга мос равишда ўзгаради.

Бироқ чеклов барча карталарга бир хил татбиқ этилмайди. Кредит шартномасида реквизитлари кўрсатилган ёки мижоз банкнинг мобил иловаси ёхуд интернет-банкинг тизимида тўловларни ундириш учун бириктирган карталарга минимал қолдиқ талаби қўлланмайди.

Амалда янги ҳимоя, асосан, кредит учун бириктирилмаган бошқа карталардаги маблағнинг тўлиқ ечиб олинишига қарши ишлайди.

Таққослаш учун, UZCARD 2026 йил 15 апрелдан акцептсиз ечиб олишда картада камида уч БҲМ сақланишини жорий қилган. Ҳозирги БҲМдан келиб чиқилса, бу 1 млн 320 минг сўмни ташкил этади — лойиҳа таклиф қилаётган минимумдан 640 минг сўмга кўп.

Бироқ қарор лойиҳасида UZCARD’нинг амалдаги юқорироқ чегараси бекор қилиниши ёки камайтирилиши кўрсатилмаган. Шу сабаб ҳужжат қабул қилиниши UZCARD карталаридаги минимал қолдиқ автоматик равишда 680 минг сўмга тушишини англатмайди.

Лойиҳа 14 сентябргача жамоатчилик муҳокамасида бўлади. Ҳужжат қабул қилинса, расмий эълон қилинган кундан уч ой ўтиб кучга киради.