«Microsoft» 60 мингга яқин ходимга ихтиёрий ишдан бўшашни таклиф қилди

26-октябр куни «Microsoft» технология гиганти харажатларни қоплаш ва чеклаш, сунъий интеллектга йўналтирилган улкан инвестицияларини молиялаштиришга ёрдам бериш мақсадида қарийб 60 минг ходимига ихтиёрий ишдан бўшаш таклифини бераётганини маълум қилди.

Масала махфий бўлгани сабабли исмини ошкор қилмасликни сўраган манбанинг айтишича, «Windows» операцион тизимини ишлаб чиқарувчи компаниянинг сунъий интеллект имкониятлари, Copilot, молия, кадрлар билан ишлаш, Xbox ҳамда Windows + Devices бўлимларида ишловчи ходимлари ҳам ушбу таклифдан фойдаланиш ҳуқуқига эга бўлади. Манбанинг қўшимча қилишича, маркетинг, тижорат фаолияти ва хавфсизлик каби бўлимлар бундан мустасно.

«Ушбу таклиф компаниядан ташқарида келажакдаги фаолиятини давом эттириш ҳақида ўйлаётган ходимларга бу ўтишни ҳозир, қўллаб-қувватлаш асосида амалга ошириш учун янги имконият беради. Шунингдек, у иштирок этувчи ташкилотларга ўз ишчи кучини ўзгариб бораётган эҳтиёжларга мослаштиришнинг яна бир усулини тақдим этади», — деди «Microsoft» компаниясининг ходимлар билан ишлаш бўйича бош директори Эми Коулман.

Бошқа йирик компаниялар сингари, «Microsoft» ҳам сунъий интеллект учун маълумотлар маркази ва чипларни яратишга юзлаб миллиард доллар сарфламоқда. Бу харажатлар ўзини оқлаши ёки оқламаслиги масаласи инвесторлар эътиборини тортмоқда.

Компания 28-октябр куни фонд бозори савдолари ёпилганидан кейин биринчи чорак натижаларини эълон қилиши кутилмоқда. «Microsoft» 2026-йил календар йили учун капитал харажатлари 175 миллиард долларни ташкил этишини прогноз қилган.

«Microsoft»нинг йиллик ҳисоботига кўра, 2026-йил 30-июн ҳолатига кўра, бутун дунё бўйлаб 223 минг тўлиқ ставкада ишловчи ходимга эга бўлган.

Жорий йилда тахминан 10 фоизга ошган «Microsoft» акциялари 27-октябр куни қарийб 1 фоизга кўтарилди. Йил бошида компания АҚШдаги ишчи кучининг қарийб 7 фоизига, яъни тахминан 9 минг ходимга ихтиёрий ишдан бўшаш таклифини берган эди.

Июл ойида «Microsoft» Xbox ўйинлар бўлинмасини қайта ташкил этиш ва бештагача студияни сотиш орқали ушбу йўналишга кўп йиллар давомида киритилган йирик инвестициялардан олинадиган даромадни ошириш мақсадида 4 минг 800 та иш ўрнини қисқартиришини эълон қилганди. Бу компания глобал ишчи кучининг қарийб 2,1 фоизини ташкил этади.

«Ушбу таклиф Канада, Ҳиндистон, Буюк Британия ва Қўшма Штатлардаги иштирок этувчи жамоаларда 70 даража ва ундан паст даражадаги ходимлар учун амал қилади», — дейилади компания баёнотида.

Компания бу вақт билан чекланган, ихтиёрий дастур экани, шунингдек, аввалги ихтиёрий пенсияга чиқиш дастуридан олинган маълумотларга асосланганини билдирди.

Эслатиб ўтамиз, аввалроқ «Microsoft» асосчиси Билл Гейтс сунъий интеллект бир миллиард одамнинг ўлимига сабаб бўлиши мумкинлигини айтганди.