Оқ кит сурати йилнинг энг яхшиси деб топилди
Австралиялик фотосуратчи табиатнинг нодир лаҳзасини муҳрлаб, халқаро танловда бош мукофотни қўлга киритди.
World Nature Photography Awards (WNPA) ташкилотчилари 2026 йил ғолибларини эълон қилди. Танловнинг энг юқори мукофоти — «Табиат фотосурати бўйича йил суратчиси» унвони австралиялик Жоно Алленга насиб этди. У оқ горбат кит ва унинг боласи акс этган таъсирли портрети билан ҳакамларнинг юксак баҳосини олди.
Мазкур кадр «Сувостида суратга олиш» номинациясида ҳам олтин медалга сазовор бўлди. Ҳакамлар ҳайъати суратни табиатнинг нозик ва камёб лаҳзасини маҳорат билан ифода этган асар сифатида баҳолаган.
Танлов ҳақида
2026 йилги мусобақада олти қитъадаги 51 мамлакатдан фотосуратчилар иштирок этди. Улар ёввойи табиатга бағишланган минглаб ишларини тақдим қилди. Мусобақада фотосуратчилар 14 та йўналишда беллашди. Ҳар бир номинацияда олтин, кумуш ва бронза медаллари топширилди. Жами 42 та иш тақдирланди.
Мукофот ҳамтаъсисчиси Адриан Динсдале ҳар йили танлов кўлами, иштирокчилар географияси ва ишлар савияси ортиб бораётганини таъкидлади. Унинг сўзларига кўра, 2020 йилда таъсис этилган мукофот нафақат энг яхши табиат суратларини оммалаштириш, балки инсонларни атроф-муҳит билан янада чуқур боғланишга илҳомлантиришни мақсад қилган.
Ғолиблар эълон қилиниши билан бирга WNPA 2027 танловига аризалар қабул қилиш ҳам расман очилди. Фотосуратчилар ўз ишларини 2026 йил 30 мартгача тақдим этиши мумкин.
