Ўзбекистон паспортининг дунё рейтингидаги ўрни кўтарилди
Ўзбекистон паспорти халқаро рейтингда 74-ўринга кўтарилиб, фуқаролар учун визасиз саёҳат қилиш мумкин бўлган давлатлар сони 59 тага етди.
© ru.pinterest.comHenley & Partners томонидан 2026 йил апрел ҳолатига кўра эълон қилинган янги ҳисоботга кўра, Ўзбекистон паспорти халқаро рейтингда ўз позициясини бир поғона яхшилаб, 74-ўринга кўтарилди.
Йил бошида мамлакат 75-поғонада эди. Янгиланган натижада Ўзбекистон бир поғона юқорилаб, Қирғизистон ва Мозамбик билан бир қатордан жой олди.
Ҳозирги кунда Ўзбекистон фуқаролари дунёнинг 59 та давлатига визасиз ёки бориш вақтида соддалаштирилган тартибда (аэропортда) виза олиб кириш имкониятига эга.
Минтақадаги ҳолат
Марказий Осиё давлатлари орасида етакчилик Қозоғистонга тегишли бўлиб, у 61-ўринни эгаллаган ва унинг фуқаролари 78 та давлатга визасиз кира олади.
Шунингдек, Тожикистон 81-ўринда (54 та давлат), Туркманистон эса 87-ўринда (47 та давлат) қайд этилган.
Жаҳон етакчилари
Рейтингнинг юқори қисмида Сингапур жойлашган бўлиб, унинг фуқаролари 192 та йўналишга визасиз саёҳат қила олади.
Кейинги ўринларда Япония, Жанубий Корея ва БАА турибди — улар фуқаролари 187 та мамлакатга эркин кириш имкониятига эга.
Рейтингнинг энг қуйи поғонасида эса Афғонистон жойлашган бўлиб, унинг фуқаролари фақат 24 та давлатга визасиз кириши мумкин.
Маълумотларга кўра, ушбу индекс Халқаро ҳаво транспорти ассоцсиацияси базасига таянади ва 199 та паспортни 227 та йўналиш бўйича таҳлил қилади.
Эслатиб ўтамиз, «Ўзбекистон–2030» стратегияси доирасида беш йил ичида визасиз йўналишлар сони яна 16 тага оширилиши режалаштирилган. 2030 йилга бориб, ўзбекистонликлар 50 та давлатга тўлиқ визасиз, яна 60 тасига эса соддалаштирилган тартибда саёҳат қилиши кутилмоқда.
