«Ўзбекнефтгаз» заводларни модернизация қилиш учун банклардан 580 млн доллар олмоқчи
Компания бунинг учун банкларга 4 та лойиҳани тақдим қилган. Улардан бири Бухоро нефтни қайта ишлаш заводини модернизация қилиш орқали Евро-5 экологик стандарти талабларига жавоб берадиган, юқори октанли бензин ишлаб чиқариш режалаштирилган. Лойиҳалар умумий қийматининг 85 фоизигача бўлган қисмини банк кредитлари орқали молиялаштириш режалаштирилмоқда.
© sputnikЎзбекистоннинг давлатга тегишли «Ўзбекнефтгаз» компанияси нефтни қайта ишлаш заводини модернизация қилиш ва газдан суюқ ёқилғи олиш (GTL) маҳсулотларини янада чуқур қайта ишлашга қаратилган тўртта лойиҳани халқаро банкларга тақдим этди. Уларни амалга ошириш учун жами 580 млн доллар маблағ жалб қилиш режалаштирилган.
Бу масала 15-октябр куни Лондонда бўлиб ўтган учрашувда муҳокама қилинди. Бу ҳақда «Ўзбекнефтгаз» компанияси бошқаруви раисининг биринчи ўринбосари Сухроб Ҳамроевнинг MUFG Bank, Deutsche Bank, JPMorgan, Standard Chartered Bank ва ICBC Standard Bank вакиллари билан учрашувидан кейин компания тарқатган хабарда маълум қилинди.
Учрашувда компаниянинг сўнгги корпоратив ўзгаришлари, молиявий натижалари ва ишлаб чиқариш кўрсаткичлари, шунингдек, режалаштирилган лойиҳаларни молиялаштириш имкониятлари муҳокама қилинди.
Компания маълумотларига кўра, 2025-йил 1-июлдан 2026-йил 30-июнгача бўлган 12 ойда «Ўзбекнефтгаз»нинг даромади 10 фоизга ошиб, 3 млрд долларга етган. Фоизлар, солиқлар ва амортизация харажатлари ҳисобга олинмасдан олдинги операцион фойда (EBITDA) эса 1,5 млрд долларни ташкил этган.
Компаниянинг соф қарзи EBITDA кўрсаткичига нисбати 3,1 баробардан 2,2 баробарга тушган. Бу унинг қарз юки камайганини кўрсатади.
Бундан ташқари, учрашувда компания қарзларини қайта тартибга солиш масаласи ҳам муҳокама қилинган.
«Ўзбекнефтгаз» аввалроқ жами 385 млн долларлик кредитларини қайта молиялаштирган ва муддатидан олдин қайтарган. Компания яна 1,1 млрд долларлик қарзларини қайта молиялаштиришни режалаштирмоқда.
Компания ҳисоб-китобларига кўра, ушбу чоралар фоиз ставкаларини пасайтириш, фоиз тўловларини камайтириш ва арзонроқ шартларда қарз олиш орқали 83 млн доллар тежаш имконини бериши мумкин.
«Ўзбекнефтгаз» банк вакилларига Ўзбекистон президенти қарорлари асосида табиий газ қазиб олиш ҳажмини барқарорлаштириш бўйича амалга оширилаётган ишлар ҳақида ҳам маълумот берган. 2026-йилнинг бошидан буён компания бешта янги конни аниқлаган. Компания келгусида газ захираларига қўшиладиган ҳажм йиллик қазиб олиш кўрсаткичидан юқори бўлишини кутмоқда.
Шунингдек, «Ўзбекнефтгаз» ўзининг бурғилаш компаниясини ташкил этган. Компания йил охиригача 120 та қудуқни бурғилаш ишларини якунлашни режалаштирмоқда. Бу 2025-йилдаги кўрсаткичдан икки баравар кўп.
Молия жалб қилиш мақсадида «Ўзбекнефтгаз» дастлабки ҳисоб-китобларга кўра, умумий қиймати қарийб 580 млн доллар бўлган тўртта лойиҳани тақдим этган. Улардан бири — Бухоро нефтни қайта ишлаш заводини модернизация қилиш. Бу орқали Евро-5 экологик стандарти талабларига жавоб берадиган, юқори октанли бензин ишлаб чиқариш режалаштирилган.
Қолган учта лойиҳа компаниянинг газдан суюқ ёқилғи олиш (GTL) заводида ишлаб чиқариладиган маҳсулотларни янада чуқур қайта ишлашга қаратилган. Компания лойиҳалар умумий қийматининг 85 фоизигача бўлган қисмини банк кредитлари орқали молиялаштиришни режалаштирмоқда.
Банк вакиллари «Ўзбекнефтгаз»да амалга оширилаётган ислоҳотлар ва компания фаолиятини ўзгартиришга қаратилган чораларни ижобий баҳолаган. Уларнинг фикрича, бу ишлар халқаро молия ташкилотларининг компанияга бўлган ишончини мустаҳкамламоқда.
Учрашув якунида томонлар ҳамкорликни давом эттиришга, жумладан, таклиф этилган лойиҳаларни молиялаштириш масаласида биргаликда ишлашга келишиб олган.
Эслатиб ўтамиз, аввалроқ «Ўзбекнефтгаз»да пасайиш кузатилиб, газ қазиб олиш йиллик режадан ортда қолаётгани ҳақида ёзган эдик.
