Қурилиш корхоналарига ўтган йилга нисбатан 845,5 млрд сўм кўп солиқ имтиёзлари берилди

2025 йил январ–сентябр ойларида қурилиш фаолияти билан шуғулланувчи 30 384 та юридик шахс томонидан 6 трлн 375,7 млрд сўмдан ортиқ солиқ тўланган. Бу ҳақда Солиқ қўмитаси маълум қилди.

Қайд этилишича, мазкур корхоналарнинг 9 ойлик товар айланмаси 131 трлн 266,9 млрд сўмни ташкил этган. Шу жумладан, уларга нисбатан 2 трлн 68,2 млрд сўмлик солиқ имтиёзлари қўлланилган.

Шунингдек, 1 трлн сўмдан ортиқ, яъни жами солиқларнинг 16,7 фоизи 20 та корхона улушига тўғри келмоқда. Уларнинг жами товар айланмаси 18 трлн сўмдан зиёд, қўлланилган солиқ имтиёзлари миқдори эса 328,5 млрд сўмни ташкил этган.

Энг кўп солиқ тўлаган 20 та корхона рўйхатида «Discover Invest» (143,1 млрд. сўм), «Agromir Buldings» (89,8 млрд.сўм), «Trest-12» (74,7 млрд.сўм) компаниялари пешқадам бўлган.

Ўтган йилнинг январ–сентябр ойларида энг кўп солиқ тўлаганлар рўйхатининг кучли учлигидан «Discover Invest» (90,3 млрд. сўм), «O‘zshahar qurilish invest» (86,5 млрд.сўм), «UET Construction» (78,7 млрд. сўм) корхоналари жойлашган бўлса, жорий йилда «O‘zshahar qurilish invest» компанияси (31,4 млрд сўм) рўйхатда 18-ўринда, «UET Construction» эса (39,7 млрд сўм) рўйхатнинг 12 поғонасидан жой олган.

Маълумот учун, 2024 йилнинг январ–сентябр ойларида 31 137 та қурилиш корхонаси 6 трлн 950,4 млрд сўм солиқ тўлаган. Яъни, 2025 йилда солиқлар ўтган йилга нисбатан қарийб 575 млрд сўмга камайган.

Бундан ташқари, 2025 йилда солиқ тўловчи қурилиш корхоналари сони 753 тага камайган бўлса ҳам, корхоналарнинг жами товар айланмаси 2024 йилнинг мос даврига нисбатан 21,2 трлн сўмга ошган.

Шу билан бирга, 2025 йилнинг 9 ойида қурилиш корхоналарига қўлланилган солиқ имтиёзлари ўтган йилнинг шу даврига нисбатан 845,5 млрд сўмга ортган.

Эслатиб ўтамиз, аввалроқ 2025 йил 4 ноябр ҳолатига кўра, 59,1 млрд сўм ҚҚС туризм, умумий овқатланиш ва айрим қишлоқ хўжалиги корхоналарига қайтарилгани ҳақида хабар берган эдик.