Республикачиларнинг қонун лойиҳаси Мелания Трампга таъсир қиладими?

Огаё штатидан сенатор Берни Морено америкаликлар учун икки фуқароликни тақиқлашни назарда тутувчи қонун лойиҳасини Сенатга тақдим этди. Newsweek ёзишича, бу ташаббус мамлакат президенти Доналд Трампнинг рафиқаси Мелания Трамп ва унинг ўғли Барронга ҳам таъсир қилиши мумкин. Мери Жордан томонидан 2020 йилда ёзилган биографияда улар ҳамон АҚШ ва Словения фуқаролигини сақлаб келаётгани қайд этилган.

«2025-йилги Эксклюзив фуқаролик тўғрисидаги қонун»да АҚШ фуқаролари фақат Қўшма Штатларга содиқ бўлиши кераклиги таъкидланади. Лойиҳага кўра, бир вақтнинг ўзида хорижий фуқароликка эга шахс АҚШ фуқароси бўла олмайди. Агар америкалик иккинчи фуқароликка эга бўлса, бир йил ичида у ё хорижий фуқароликдан, ё АҚШ фуқаролигидан воз кечиши талаб этилади. Акс ҳолда шахс автоматик тарзда АҚШ фуқаролигидан ихтиёрий воз кечган деб ҳисобланади.

Морено ўз баёнотида Америка фуқароси бўлиш шараф экани, содиқлик қасами ёлғиз АҚШга қаратилган бўлиши кераклигини таъкидлади. Унинг фикрича, икки фуқароликни тўлиқ бекор қилиш вақти етган.

Мелания Трамп 2006 йилда АҚШ фуқаролигини олган бўлса-да, турли манбалар у ва Баррон Словения фуқаролигини ҳам сақлаётганини маълум қилмоқда. Жорданнинг таъкидлашича, Словения паспорти Баррон учун Европада ишлаш имкониятларини кенгайтиради, Мелания эса ўғлига кўпроқ имконият яратиш мақсадида бу фуқароликни сақлаб қолган.

Бироқ лойиҳа жиддий конституциявий тўсиқларга дуч келиши мумкин. АҚШ Конституциясининг Ўн тўртинчи тузатишига мувофиқ, фуқаро ўз хоҳиши билан воз кечмас экан, ундан фуқароликни олиб қўйиш мумкин эмас. Олий суднинг «Афройим в. Руск» 967) иши бўйича қарори ҳам фуқароликдан мажбурий маҳрум қилиш мумкин эмаслигини белгилаган.

Лойиҳа Сенат қўмитасига ўтказилган бўлиб, республикачи раҳбарлар уни қўллаб-қувватлайдими – ҳозирча номаълум. Ҳатто қўллаб-қувватлаш бўлса ҳам, мутахассислар ташаббус деярли шубҳасиз конституциявий зиддиятларга учрашини айтишмоқда.