Россия Хитойга суюлтирилган газни 40 фоиз арзонига сотмоқда — Reuters
Reuters маълумотига кўра, Хитойга августдан бери жами 14 та арзон СТГ партияси юборилган.
Россиянинг йирик энергетика компанияси НОВАТЭК 2025 йил августидан бери ўзининг «Арктик СТГ-2» лойиҳасидан олинаётган суюлтирилган табиий газ (СТГ)ни Хитойга 30–40 фоизлик чегирма билан сотмоқда. Бу ҳақда Reuters ахборот агентлиги, вазиятдан хабардор манбаларга таяниб хабар берди.
Маълумотларга кўра, илк партия 28 август куни Хитойга етказилган ва у вақтда 1 млн BTE учун базавий нарх (11 доллар)дан 3–4 доллар кам нархда сотилган. Кейинги 13 партия ҳам шундай катта чегирмалар билан экспорт қилинган. Reuters манбаларига кўра, умумий нарх ҳар бир партия учун 28–32 млн доллар оралиғида бўлган, бу эса бозордаги ўртача 44 млн долларлик нархдан анча арзон ҳисобланади.
«Арктик СТГ-2» лойиҳасига АҚШ, ЕИ, Канада ва Буюк Британия томонидан санкциялар жорий этилган. Бу санкциялар лойиҳанинг халқаро молиявий ва техник таъминлаш имкониятларини чеклагани боис, Россия Хитой мижозларини сақлаб қолиш учун нархни пасайтиришга мажбур бўлган.
Reuters Хитойдаги аниқ харидор компаниялар номини аниқлай олмаганини таъкидлаган. Лекин экспертлар бундай келишувлар Россиянинг санкциялар шароитидаги экспорт стратегиясида Хитойга бўлган қарамлик кучайиб бораётганини кўрсатишини қайд этмоқда.
