Смартфон ва электроника нархлари кескин ошиши кутилмоқда
Сунъий интеллект тармоғидаги юқори талаб, Nvidiaнинг янги қарорлари ва таъминот зинасидаги узилишлар смартфон ҳамда электроника нархларини жаҳон бозорида ошириб юбориши мумкин.
CNBC маълумотига кўра, глобал электроника бозорида янги хавотир юзага келди — смартфонлардан тортиб, ноутбук ва маиший техникагача бўлган маҳсулотлар нархи яқин ойларда ошиши мумкин. Бунинг асосий сабаби — сунъий интеллект инфратузилмасига бўлган улкан талаб.
Google, Microsoft каби технологик гигантлар СИ марказлари учун юзлаб миллиард доллар сарфлаётгани натижасида, Nvidia ва AMD каби етакчи чип ишлаб чиқарувчиларнинг маҳсулотига бўлган эҳтиёж рекорд даражада ўсди.
Bain&Company шериги Питер Генбери таъкидлашича, СИ дата-марказларидаги улкан талаб бутун таъминот занжирида «тўсиқлар» яратмоқда. Энг катта муаммо эса DRAM хотира ва HBM туридаги тезкор хотира ҳажмининг чекланганлиги бўлиб турибди. Counterpoint Research прогнозига кўра, DRAM нархлари шу йилнинг IV чорагида 30 фоизга, 2026 йил бошида яна 20 фоизга қимматлаши мумкин.
Иккинчи жиддий омил — SSD ва HDD бозоридаги танқислик. Google ва Microsoft HDDдан воз кечиб, SSDга ўтмоқда, бу эса смартфон ва ноутбук учун зарур бўлган асосий компонентлар бўйича рақобатни кучайтирмоқда.
Nvidiaнинг энг янги нияти вазиятни янада мурaккаблаштирди. Компания LPDDR туридаги хотирадан фойдаланишга ўтди. Бундай турдаги хотиралар эса одатда Apple ва Samsung’нинг премиум смартфонларида ишлатилади. Nvidiaнинг бу сегментга кириши «йирик смартфон ишлаб чиқарувчиси каби талаб яратиши», бу таъминот занжири учун «кучли зарба» сифатида қабул қилиниши айтилмоқда.
Мутахассислар ҳисоб-китобига кўра, DRAM ва SSD смартфон ёки шахсий компютер таннархининг 10–25 фоизини ташкил этади. Таркибий қисмларнинг 20–30 фоизга қимматлашиши тайёр маҳсулот нархини 5–10 фоизга кўтариши мумкин. Шу билан бирга, энг оммабоп гаджетларда қисман тақчиллик юзага келиши эҳтимоли ҳам юқори.
