Такер Карлсон АҚШнинг якунини башорат қилди
Таниқли журналист АҚШ штатлари марказий бошқарувни тан олмайдиган кунлар келишини эълон қилди.
Миннесота штатининг Миннеаполис шаҳрида ноқонуний мигрантларга қарши ўтказилган рейд чоғидаги отишма ва унинг оқибатида бир кишининг ҳалок бўлиши АҚШда фуқаролар урушига ҳамда мамлакатнинг парчаланишига олиб келиши мумкин. Бу фикрни таниқли америкалик журналист Такер Карлсон ўзининг YouTube платформасидаги муаллифлик кўрсатувида билдирди.
«Бундан келиб чиқадиган асосий хулоса шуки, мамлакат парчаланиб кетади. Бу — фуқаролар урушидир. Фуқаролар урушининг таърифи ҳам айнан шундай. Мамлакатда федерал ҳокимиятни тан олмайдиган, ички бошқарувга эга ҳудудлар ва штатлар пайдо бўлади. Натижада биз аввалига кенг кўламли зўравонликка, кейин оммавий қирғинларга, сўнгра эса фуқаролар урушига дуч келамиз», — деди Карлсон мамлакатда давом этаётган норозилик намойишларининг эҳтимолий оқибатлари ҳақида гапирар экан.
Федерал ҳукуматга қарши исён сифатидаги норозиликлар
Журналистнинг баҳолашича, бўлиб ўтаётган акциялар ўз характерига кўра шунчаки миграция масаласига оид чиқишлар эмас, балки кўпроқ федерал ҳукуматга қарши кўтарилган исёнга ўхшамоқда.
«Ҳозирда ҳақиқатдан ҳам аҳамиятли бўлган ягона нарса — мамлакат бўлиниб кетишининг олдини олишдир. Бундай воқеалар эса муқаррар равишда парчаланишга ва ҳақиқий зўравонликка етаклайди», — дея таъкидлади у.
ICE рейдлари ва баҳсли отишмалар
Эслатиб ўтамиз, январ ойи бошида Миннеаполисда ICE (Иммиграция ва божхона назорати хизмати) ходимлари ўтказган рейд давомида 37 ёшли АҚШ фуқароси Рене Никол Гуд агент томонидан отиб ўлдирилган эди. Шундан сўнг шаҳарда иммиграция хизмати ҳаракатларига қарши оммавий норозилик намойишлари бошланиб кетди. АҚШ маъмурияти расмийлари офицер ўзини ҳимоя қилиш мақсадида қурол ишлатганини билдирган.
Бироқ 24 январ куни Миннеаполисда яна бир мудҳиш воқеа юз берди: ICE агентлари 37 ёшли тиббиёт ходими Алекс Жеффри Преттини отиб ўлдирди. АҚШ Миллий хавфсизлик вазирлиги эркак қуролланган бўлгани ҳақида хабар берган бўлса-да, видеоёзувлар Преттининг қўлида тўппонча эмас, балки телефон бўлганини фош қилди. Кадрларда Претти ходимларга яқинлашгани, улар уни ерга йиқитиб, сўнгра ўқ узишгани акс этган.
