Талабалар контрактни қачонгача тўлаши керак?
Ўзбекистонда университетда контракт асосида ўқиётган талабалар тўловни бирйўла амалга оширмасдан, йил давомида босқичма-босқич тўлаши мумкин. Vaqt.uz навбатдаги мақолада контракт пулини бўлиб тўлаш тартибларини тушунтиради.
Олий таълим учун тўлов-контракт суммаси кўплаб талабалар ва уларнинг оилалари учун йил давомида режалаштириладиган катта харажатлардан бири. Шу сабабли контракт пулини бирданига тўлаш имконияти бўлмаган оилалар учун уни босқичма-босқич тўлаш тартиби белгиланган.
Амалдаги тартибга кўра, абитуриентлар контрактнинг дастлабки 25 фоизини 15-сентябргача, юқори курслар эса 1-октябргача тўлайди, кейинги тўловлар эса йил давомида 50, 75 ва 100 фоизгача етказиб борилади.
Бунда дастлабки тўлов муддати талабанинг қайси босқичда ўқиётганига қараб фарқ қилади:
Мазкур муддатлар олий таълим ташкилоти ректори томонидан узайтирилиши мумкин. Шунингдек, давлат комиссияси ҳам белгиланган тўлов муддатларини узайтириш ваколатига эга.
Демак, контрактни «4 га бўлиб тўлаш» деганда ҳар сафар айнан 25 фоиздан тўлаш мажбурияти эмас, балки белгиланган санагача контрактнинг жами тўланган қисмини 25, 50, 75 ва охирида 100 фоизга етказиш назарда тутилади.
Масалан, Тошкент давлат юридик университетининг Юриспруденция йўналиши кундузги таълим шакли учун 2026/2027-ўқув йилида бир йиллик тўлов-контракт миқдори 22 млн 496 минг 700 сўм этиб белгиланган.
Бунда контрактнинг дастлабки 25 фоизи 5 млн 624 минг 175 сўмни ташкил этади. Иккинчи босқичда жами тўлов 50 фоизга, яъни 11 млн 248 минг 350 сўмга етказилиши керак. Кейинги босқичларда ҳам худди шу тартибда тўлов қилиниб, контракт суммаси босқичма-босқич 75 ва 100 фоизга етказилади.
Контракт шартномасини қандай олиш мумкин?
Контрактни тўлашдан олдин талаба ўзининг тўлов-контракт шартномасини олиши ва ундаги сумма ҳамда тўлов реквизитларини текшириши керак.
Давлат ОТМларининг талабалари шартномани my.gov.uz ва kontrakt.edu.uz тизимлари орқали электрон шаклда бепул олиши мумкин.
Шартномани олиш учун қуйидаги амалларни бажариш керак:
1.My.gov.uz орқали контракт шартномасини олиш тартиби
● my.gov.uz сайтини очинг ва шахсий кабинетга киринг.
● Қидирувга «Тўлов-контракт шартномасини олиш» деб ёзинг.
● Давлат ОТМлари талабалари учун «тўлов-контракт шартномасини олиш» хизматини танланг.
● Хизмат саҳифасидаги «Хизматдан фойдаланиш» тугмасини босинг.
● Тизим сўраган маълумотларни текширинг ва керакли маълумотларни киритинг.
● Сўровни юборинг.
● Ариза 5 иш куни ичида кўриб чиқилади
● Ариза тасдиқлангач, тайёр электрон шартномани шахсий кабинет орқали юклаб олиш мумкин.
2.Kontrakt.edu.uz орқали шартнома олиш тартиби
● kontrakt.edu.uz сайтига киринг.
● Тизимдаги шахсий кабинетга киринг ёки керак бўлса, рўйхатдан ўтинг.
● Шахсий кабинетдан тўлов-контракт шартномасини олиш билан боғлиқ хизматни танланг.
● Шартнома учун онлайн ариза юборинг.
● Ариза юборилгач, унинг ҳолатини шахсий кабинет орқали кузатиб боринг.
● Ариза тасдиқлангач, электрон шартномани тизим орқали юклаб олинг.
Шартнома олиш учун қандай ҳужжатлар талаб қилинади?
Контракт шартномасини электрон шаклда олишда алоҳида ҳужжат нусхаларини юклаш талаб этилмайди. Талабанинг маълумотлари тизим орқали шакллантирилади ва шартнома электрон кўринишда тақдим этилади.
Шартномани олгач, ундаги контракт суммаси, талаба маълумотлари ва тўлов реквизитларини текшириб олиш керак. Шундан сўнг контрактни онлайн ёки банк орқали тўлаш мумкин.
