Трамп Ню Йорк мери Мамдани билан учрашувдан кейин у ҳақидаги фикрини ўзгартирди
Оқ уйда бўлиб ўтган учрашув Доналд Трамп ва Зоҳран Мамдани ўртасидаги кескин сиёсий баҳсларни юмшатди.
АҚШ президенти Доналд Трамп Ню Йоркнинг янги сайланган мери Зоҳран Мамдани билан Оқ уйда ўтказган учрашувдан кейин унга нисбатан муносабати сезиларли даражада ўзгарганини маълум қилди.
АҚШ президенти журналистлар саволларига жавоб берар экан, Мамдани билан кутилганидан кўра кўпроқ масалаларда яқин қарашларга эгалигини таъкидлади.
Трамп учрашув уни «ростдан ҳам ҳайратга солганини» айтиб, Мамданининг жиноятчиликни камайтириш, уй-жой қурилишини ривожлантириш ва ижара нархларини пасайтиришга йўналтирилган режаларини қўллаб-қувватлашини билдирди.
Президент аввалроқ Мамданини қаттиқ танқид қилган, ҳатто уни «коммунист» деб атаган ва Ню Йоркка федерал маблағларни қисқартиш билан таҳдид қилган эди.
Шунга қарамай, Трамп бу гал Ню Йоркка зарар етказишни истамаслигини, аксинча, янги маъмуриятга ёрдам бериш нияти борлигини айтди. Унинг фикрича, Мамдани шаҳар учун муҳим ишлар қилиш имконига эга ва федерал ҳукумат бу жараённи қўллаб-қувватлаши керак.
«Мен унга зарар етказиш ўрнига ёрдам бераман, катта ёрдам кўрсатаман, чунки Ню Йорк буюк бўлишини хоҳлайман. Менимча, бу мер ҳақиқатан ҳам бир нечта улкан ишларни амалга ошира олади», деган Трамп.
Reuters ёзишича, Оқ уйдаги вазият кутилганидан анча илиқ кечган. Президент ва 34 ёшли демократик сиёсатчининг илк учрашуви шунчаки расмий мулоқот эмас, балки сиёсий ўйинларни ўзгартириши мумкин бўлган янги иш муносабатларининг бошланиши сифатида баҳоланган.
Оқ уй раҳбари ҳатто Мамдани бошқарувидаги Ню Йоркда ўзини анча қулай ҳис қилишини айтиб ўтди.
Мутахассислар таъкидлашича, Мамданининг ижара ҳақларини музлатиб қўйиш, бепул болалар парвариши ва оммавий транспортни арзонлаштириш ҳақидаги ваъдаларини рўёбга чиқариш осон бўлмаса-да, Трамп билан мулоқотнинг ижобий руҳда кечиши унинг маъмурияти учун қўшимча имкониятлар яратади.
Эслатиб ўтамиз, 34 ёшли демократик сиёсатчи Зоҳран Мамданий Ню Йорк шаҳар мери сайловида ғалаба қозонган эди. У шаҳар тарихида бу лавозимни эгаллаган илк мусулмон сифатида тарихга кирди.
