Turkmaniston Eron samolyotiga o‘z hududidan uchib o‘tishga ruxsat bermadi
Tehron–Dushanbe reysi Turkmaniston havo hududidan o‘tishga ruxsat berilmagani sababli orqaga qaytdi.
Eronning Tehrondan Dushanbe shahriga yo‘l olgan yo‘lovchi samolyoti Turkmaniston havo hududidan uchib o‘tishga ruxsat berilmagani sababli Tehronga qaytdi. Bu haqda Eron Fuqaro aviatsiyasi tashkiloti ma’lum qildi.
Unga ko‘ra, Turkmaniston Eron aviakompaniyalariga o‘z havo hududidan tranzit parvozni amalga oshirish uchun ruxsat bermagan. Shu sababli Tehron–Dushanbe reysi belgilangan manzilga yetib bormasdan, Imom Humayniy xalqaro aeroportiga qaytgan.
Eron Fuqaro aviatsiyasi tashkiloti matbuot kotibi Majid Axavonning bildirishicha, Turkmaniston tomonidan ruxsat berilmagani sababli samolyot o‘z yo‘nalishini davom ettira olmagan.
Hodisa 24-sentabr kuni sodir bo‘lgan. Reys Eronning Varesh Airlines aviakompaniyasi tomonidan amalga oshirilgani xabar qilindi.
Keyinchalik Dushanbe yo‘nalishidagi parvozlar Turkmaniston havo hududini chetlab o‘tish imkoniyati bilan bog‘liq variantlar orqali amalga oshirilishi aytilgan.
Turkmaniston tomonidan ushbu holat bo‘yicha hozircha alohida rasmiy izoh e’lon qilinmagan.
Voqea Eron aviakompaniyalarining mintaqadagi parvozlari bo‘yicha cheklovlar kuchaygan davrga to‘g‘ri kelmoqda. 24-sentabrdan Birlashgan Arab Amirliklari Eron aviakompaniyalari tomonidan amalga oshiriladigan barcha parvozlarni mamlakatga kirish va chiqish bo‘yicha to‘xtatgan. Bunga AQSHning Eron aviatsiya sohasiga nisbatan sanksiyalari asos qilib ko‘rsatilgan.
Eron tomonining ma’lum qilishicha, ayrim davlatlar bilan parvozlarga qo‘yilgan cheklovlarni bekor qilish bo‘yicha diplomatik va aviatsiya sohasida muzokaralar olib borilmoqda.
