Уч йил кутилган хонадонлар

2026-йил 28-март куни Vaqt.uz Тошкент шаҳри Яшнобод туманидаги «Triumph» тураржой мажмуасидан хонадон сотиб олган, бироқ уйларини ўз вақтида ололмаётган фуқаролар муаммосини ёритган эди. Ўшанда маълум бўлишича, харидорлар ва қурилиш билан шуғулланган «RM Minora» МЧЖ ўртасида инвестициявий шартномалар тузилган. Шартномаларда хонадонларни 2023-йил 1-декабргача фойдаланишга топшириш белгиланган. Бироқ бу муддат бажарилмаган.

Орадан саккиз ой ўтиб, 14-октабр куни Vaqt.uz мухбири яна мажмуага борди. Фуқаролар қурилишда маълум ўзгаришлар бўлганини, аммо улар хонадонларни топшириш учун етарли эмаслигини айтмоқда.

«Икки ой ишлашди, кейин яна секинлашди»

Эвелина Мочалованинг айтишича, март ойидаги репортаждан кейин қурилиш дастлаб жонланган. Унинг таъкидлашича, тахминан икки ой давомида ишчилар кўпайган, ишлар олдинга силжиган. Бироқ кейинчалик қурилиш яна секинлашган.

«Бизга қурилишни сентябрда тугатишни ваъда қилишганди. Мана, шу йилнинг сентябрида улар бутун объектни тўлиқ тугатишни режалаштиришганди. Лекин кўриб турганингиздек, ҳеч қандай тугатиш йўқ», — дейди у.

Эвелинанинг сўзларига кўра, оиласи уч йилдан бери ижарада яшамоқда. Унинг кичик фарзанди бор, бироқ хонадон фойдаланишга тайёр бўлмагани сабабли оиласи ўз уйига кўчиб ўта олмаяпти.

Беҳзод Мақсудов ҳам қурилишда олдинга силжиш борлигини, лекин бу сезиларли даражада эмаслигини айтади. Унинг таъкидлашича, харидорлар прокуратура, Ички ишлар вазирлиги, Қурилиш вазирлиги ва солиқ идораларига мурожаат қилган.

«Охирги мурожаатимиздан бери қурилиш олдинга силжиди, лекин сезиларли даражада эмас. Қурилиш жуда секин кетмоқда. Шартнома бўйича кечикишга уч йил бўлди ва уй ҳали ҳам топширилмаган», — дейди у.

Мақсудовнинг фикрича, харидорлар муаммосини оммага олиб чиққанидан кейин қурилишда фаоллик кузатилган. У ишларнинг мунтазам давом этиши ва шартнома мажбуриятларининг бажарилишини талаб қилмоқда.

Ижара харажатлари ва битмаган уйда яшашга мажбур бўлганлар

Мажмуадаги муаммо фақат қурилиш муддатининг чўзилгани билан чекланмайди. Айрим харидорлар ўз уйига кўчиб киришни кутиб, йиллар давомида ижара тўлашга мажбур бўлган. Бошқалар эса ижара харажатларини кўтара олмагани сабабли ҳали тўлиқ тайёр бўлмаган хонадонларига кўчиб кирганини айтмоқда.

Фуқаролардан бири 2022-йилда иккита хонадон сотиб олганини, улар учун тўловларни амалга оширганини ва бир неча йил ижара уйда яшаганини билдирди. Унинг айтишича, ижара учун ҳар ой олти миллион сўм тўлаш оиласига оғирлик қилган.

«Уч-тўрт ой олдин кўчиб келдик, чунки ижарада яшаш, тўғрисини айтсак, жонга тегди», — дейди у.

Бироқ фуқаронинг таъкидлашича, янги хонадонда ҳам муаммолар мавжуд: газ йўқ, кириш-чиқиш шароитлари ноқулай, болалар учун хавфсиз муҳит етарли эмас.

Александра Кирееванинг айтишича, унинг оиласи 2023-йил сентябрида 40 квадрат метрли студия хонадон сотиб олган. Хонадон ўша йилнинг декабрида топширилиши керак эди. Аммо у турмуш ўртоғи ва кичик фарзанди билан ҳануз ижарада яшаётганини билдирди.

«Уч йилдан бери ижарада яшаяпмиз ва ўз квартираларимизга кўчиб кира олмаяпмиз», — дейди у.

Фуқароларнинг айтишича, мажмуадаги айрим блоклар яшаш учун нисбатан тайёр кўринса-да, барча хонадонлар бир хил ҳолатда эмас. Шу сабабли улар қурилишнинг қачон тугаши билан бирга, уйларни фойдаланишга топшириш ва кадастр ҳужжатларини расмийлаштириш муддатларини ҳам билишни истамоқда.

Тўлов тўлиқ амалга оширилган, кадастр эса йўқ

Мажмуадан хонадон сотиб олган Гулбаҳор Назарова 2022-йил 12-августда икки хонали, 52 квадрат метрли хонадон учун шартнома тузганини айтади. Унга кўра, дастлаб хонадон қийматининг ярмига яқинини тўлаган, қолган суммани эса 2023-йил августигача тўлиқ қоплаган.

Унинг айтишича, хонадон учун умумий тўлов қарийб 380 миллион сўмни ташкил этган. Шартномада уй 2023-йилнинг тўртинчи чорагида топширилиши кўзда тутилган, бироқ у ҳануз калит ва кадастр ҳужжатини олмаган.

Гулбаҳор ногирон фарзанди билан ижарада яшаётганини ва бунинг учун ойига 400 доллар тўлаётганини билдирди.

«Шартномага кўра, ҳам кадастр, ҳам калитни олишим керак эди. Ҳалигача, мана 2026-йил бўлдими, уч йилдан бери муддат кечикяпти», — дейди у.

Унинг таъкидлашича, хонадони ички ҳолати бўйича анча тайёр бўлса-да, кадастр ҳужжатисиз ундан тўлиқ фойдаланиш имконияти йўқ. Фуқаро хонадонни ҳужжатлари билан олишни ёки шартномада кўзда тутилган мажбуриятлар бажарилишини истамоқда.

Андрей Терентев ҳам мажмуада бир нечта хонадон ва тижорат биноси борлигини, сармоя киритган харидорлар орасида ижарада яшаётганлар мавжудлигини айтади. Унинг фикрича, бу ҳолат нафақат харидорлар, балки лойиҳага сармоя киритганлар олдидаги ишонч масаласига ҳам таъсир қилмоқда.

«Triumph» қайси компанияга тегишли?

Очиқ маълумотларга кўра, «Triumph» тураржой мажмуаси қурилиши билан «RM Minora» МЧЖ боғлиқ. Компания 2008-йил 16-майда рўйхатдан ўтган. Очиқ корхона маълумотларида унинг раҳбари Санжар Джумакулов сифатида кўрсатилган. Қурилиш объектининг очиқ паспортида «RM Minora» МЧЖ буюртмачи ва пудратчи сифатида қайд этилган. Ҳужжатда Авиасозлар кўчасидаги тураржой биносининг А, Б, В, Г, Д, Э ва Ж блоклари, пастки қаватлардаги савдо мажмуалари ҳамда ерости автотураргоҳи тилга олинади.

Кўчмас мулк каталогларида компания «Triumph Residence» лойиҳаси билан кўрсатилган. Биз ўрганган очиқ манбаларда «RM Minora»нинг бошқа қуриб битказилган тураржой мажмуалари ҳақида етарлича тасдиқланган маълумот топилмади. Бу компаниянинг бошқа лойиҳалари мавжуд эмаслигини англатмайди. Мазкур масала бўйича компаниянинг расмий изоҳи муҳим.

Қурилиш нега секинлашган?

Харидорлар қурилиш майдонида ишчилар сони камлигини, ишларнинг айрим даврларда жонланиб, кейин яна секинлашганини айтмоқда. Динара Жўраеванинг таъкидлашича, қурилишдаги ишчилар сони катта мажмуа учун етарли эмас. Унинг айтишича, ишчилар билан суҳбатларда маошнинг вақтида берилмаслиги ҳақидаги гапларни эшитган.

Бу маълумотлар ҳозирча фуқароларнинг баёнларига асосланган. Қурилишнинг секинлашишига молиялаштириш, пудратчилар билан ҳисоб-китоблар ёки бошқа омиллар сабаб бўлган-бўлмаганини тасдиқлайдиган ҳужжатлар тақдим этилмаган.

28-мартдаги мақоламизда «RM Minora» вакили қурилиш ишлари тўхтамаганини, молиявий масалалар ўрганилаётганини ва ишлар тез орада якунланишини билдирган эди.

16-октабр куни биз компанияга сўров юбордик. Унда қурилишнинг белгиланган муддатда тугалланмагани, ҳозирги ишлар ҳолати, харидорлар олдидаги мажбуриятлар ва хонадонларни топшириш муддатлари юзасидан саволлар берилди.

Компания вакиллари сўровга 15 кун ичида жавоб берилишини маълум қилди. Жавоб келиб тушгач, ундаги изоҳлар ва тегишли маълумотларни ҳам эълон қиламиз.

Ҳозирча харидорларнинг асосий талаби ўзгармаган: улар хонадонларини аниқ муддатда, тегишли ҳужжатлари билан олишни истамоқда. Орадан қарийб уч йил ўтган бўлса-да, бу саволга якуний жавоб кутилмоқда.

Бахтиёр Тўхтаев, журналист

Оператор ва монтажчи: Мироқил Хайруллаев