Хитойнинг қарз бериш стратегияси ўзгарди
«Бир макон — бир йўл» ташаббуси орқали ривожланаётган давлатларнинг кредитори бўлган Хитой энди асосан юқори даромадли мамлакатларга кредит беришни бошлаган.
Хитой ўзининг қарз бериш стратегиясини ўзгартириб, кўпроқ юқори даромадли мамлакатларга қарз беришни бошлади. Бу ҳақда АҚШнинг William & Mary университети тадқиқотчилари ўз ҳисоботида маълум қилди.
Қайд этилишича, 2000 йилдан 2023 йилгача Хитой дунё бўйлаб 200 та мамлакатнинг барча минтақаларига жами 2,2 триллион доллар миқдорида кредит ва грантлар берган.
Таъкидланишича, Хитой узоқ вақтдан бери ўзининг «Бир камар — бир йўл» ташаббуси орқали ривожланаётган мамлакатларнинг кредитори сифатида қараб келинган. Бироқ, энди у кўпроқ ривожланган иқтисодиётларга кредит беришга ҳаракат қилмоқда. Бу жараёнда Хитой яримўтказгичлар, сунъий интеллект ва қайта тикланадиган энергия каби соҳаларда стратегик инфратузилма ҳамда юқори технологияли таъминот занжирларини қўллаб-қувватлашга эътибор қаратмоқда.
AidData маълумотларига кўра, Пекиннинг кредит портфели аввалги тахминлардан икки-тўрт баравар каттароқ бўлиб, Хитой ҳали ҳам дунёдаги энг йирик расмий кредитор бўлиб қолмоқда.
Хитойнинг хориждаги кредит операцияларининг тўртдан уч қисми ҳозирда юқори ўрта даромадли ва юқори даромадли мамлакатлардаги лойиҳаларни молиялаштиришга йўналтирилган.
Ҳисоботда айтилишича, Хитойдан энг кўп расмий кредит олган давлат АҚШ бўлиб, хитойлик кредиторлар мамлакатнинг деярли ҳар бир штатида газ қувурларидан тортиб, аэропортларгача бўлган 2,5 мингга яқин лойиҳани молиялаштирган. Кредитлар умумий миқдорининг ярмидан кўпи — 103 миллиард доллар 2018 йилдан кейин ажратилган.
Хитой молиявий инстутлари Американинг Fortune 500 рўйхатига кирувчи Amazon, Halliburton, Tesla, Boeing, Qualcomm ва Disney каби йирик компанияларининг фаолияти учун мунтазам равишда кредит линияларини тақдим этиб келган.
