Европа Россия газидан бутунлай воз кечиш жараёнини тезлатди
Евроиттифоқ элчилари Россия газини 2027 йил охиригача тўхтатиш режасини маъқуллади. Кейинги босқич — Европа Парламенти ва энергетика вазирларининг расмий тасдиғи.
Европа Иттифоқи Россия газига боғлиқликни тугатиш бўйича навбатдаги муҳим қадамни ташлади. Иттифоққа аъзо мамлакатлар элчилари чоршанба куни Россиядан газ импортини босқичма-босқич тўхтатиш юзасидан келишилган режани тасдиқлади. Бу — тақиқни қонун сифатида кучга киритишдан олдинги ҳал қилувчи босқичлардан бири экани таъкидланди. Дания раислиги вакиллари бу қарорни ЕИнинг энергетик мустақилликка ўтишдаги стратегик бурилиши деб атади.
Европа Иттифоқи ўтган ҳафта Россия билан газ соҳасидаги барча алоқаларни узишни назарда тутган қонун лойиҳаси бўйича келишувга эришган эди. Бу қадам Москва 2022 йилда Украинага кенг кўламли босқин бошлаганидан кейин ваъда қилинган сиёсий йўналишнинг амалий ижроси ҳисобланади. Якуний келишувга кўра, Россиядан денгиз орқали келадиган суюлтирилган табиий газ 2026 йил охиригача тўлиқ тўхтатилади. Қувур орқали етказиб бериладиган газ эса 2027 йил 30 сентябрга қадар босқичма-босқич тугатилади.
Аммо тақиқ қонун кучига кириши учун яна икки босқич қолган: Европа Парламенти келаси ҳафтада овоз бериши, энергетика вазирлари эса 2026 йил бошида расмий маъқуллашни амалга ошириши кутилмоқда.
Евроиттифоқ расмийлари мазкур қарор ЕИдаги кенг кўламли кўпчилик томонидан қўллаб-қувватланишига ишонишмоқда. Шунга қарамай, Венгрия ва Словакия каби Россия газига ҳали ҳам боғлиқ давлатлар ошкора қаршилик билдиришда давом этмоқда.
Россия газидан воз кечиш ЕИ учун улкан инфратузилмавий ўзгаришлар ва катта сармояларни талаб қилади. Бироқ Евроттифоқ ҳозироқ АҚШ, Норвегия ва Қатардан СТГ импортларини ошириш, шунингдек, қайта тикланувчи энергия улушини кенгайтириш орқали эҳтиёжларни қоплашни режалаштирган.
