115-sonli avtobus yo‘nalishi uzaytirildi

Toshkent shahrida jamoat transporti infratuzilmasi takomillashtirilishi doirasida 115-sonli «ToshGRES ma’muriy binosi — Gulobod ko‘chasi» avtobus yo‘nalishi 2025 yil 4-dekabrdan boshlab G‘isht zavod bekatigacha uzaytirildi.

Mazkur qaror 2025 yil 9-iyul kuni o‘tkazilgan videoselektor yig‘ilishida berilgan topshiriqlarni amalga oshirish yo‘nalishida qabul qilindi. Yo‘nalishni uzaytirish orqali Toshkent viloyatining ayrim yondosh hududlarini poytaxt bilan bog‘lash, shuningdek, tirbandliklarni kamaytirish ko‘zda tutilgan.

«Toshshahartransxizmat» AJ axborot xizmatiga ko‘ra, yangilangan yo‘nalishda avtobuslar 05:00 dan 23:15 gacha qatnaydi. Ushbu o‘zgarish yo‘lovchilar uchun kun davomida barqaror va qiyinchiliksiz qatnov imkonini ta’minlashga qaratilgan. Kompaniyaga ko‘ra, vaqt oralig‘ining uzoq belgilanishi aholi talabi va tashish hajmini inobatga olgan holda amalga oshirilgan.

Shu bilan birga, yo‘nalishning G‘isht zavod bekatigacha uzaytirilishi aholi yashash massivlari va muhim ishlab chiqarish nuqtalariga jamoat transportida tez yetib borish imkonini oshiradi. Yangilangan qatnov tartibi kundalik safarlarga moslashtirilgan bo‘lib, ayniqsa ishga va o‘qishga boradigan yo‘lovchilar uchun yengillik yaratishi kutilayapti.

Transport tizimini takomillashtirishga qaratilgan bunday qadamlar poytaxt va uning atrofida yuzaga kelayotgan tirbandliklarni pasaytirish, shuningdek, xususiy avtomobillardan foydalanish ulushini kamaytirishga xizmat qiladi.

Eslatib o‘tamiz, 12-oktabrdan boshlab Toshkentda 197-sonli yangi avtobus yo‘nalishi ishga tushirilgan. U poytaxt markazini «Yangi Toshkent» hududi bilan bog‘laydi va kun davomida yo‘lovchilarga xizmat ko‘rsatadi.