Apple Google'ning Gemini sun’iy intellekti uchun yiliga 1 milliard dollar to‘lamoqchi
Apple kompaniyasi Google'ning 1,2 trillion parametrli Gemini sun’iy intellekt modelini Siri yordamchisini yangilashda qo‘llash bo‘yicha kelishuvni yakunlamoqda. Shartnoma qiymati yiliga taxminan 1 milliard dollarni tashkil etadi.
Bloomberg ma’lumotlariga ko‘ra, Apple Inc. va Alphabet Inc. (Google'ning bosh kompaniyasi) sun’iy intellekt sohasida yirik hamkorlik kelishuviga yaqinlashmoqda. Tasdiqlansa, bu kelishuv doirasida Apple har yili taxminan 1 milliard dollar to‘lab, Google'ning 1,2 trillion parametrli Gemini modelidan foydalanadi.
Yangi sun’iy intellekt Siri'ning yangilangan versiyasida asosiy vazifalar — ma’lumotlarni qisqacha bayon etish va rejalashtirish funksiyalarini bajaradi. Apple'ning aytishicha, bu faqat vaqtinchalik yechim bo‘lib, kompaniya 2026 yilga qadar o‘zining 1 trillion parametrli klaud asosidagi modelini ishlab chiqmoqda.
«Glenwood» nomi bilan ma’lum ichki dastur doirasida Siri'ni qayta yaratish ustida Apple'ning bosh muhandisi Kreyg Federigi va Vision Pro qurilmasi yaratuvchisi Mayk Rokuell ish olib bormoqda. Yangi ovozli yordamchi «Linwood» kod nomi bilan iOS 26.4 tizimida joriy etilishi rejalashtirilgan.
Apple Siri'ning ma’lum qismlarida o‘zining ichki modellarini saqlab qoladi, ammo asosiy «summarizer» va «planner» modullari Google'ning Gemini tizimi orqali ishlaydi. Barcha jarayonlar Apple'ning xususiy bulut infratuzilmasi — Private Cloud Compute orqali amalga oshiriladi, bu esa foydalanuvchilar ma’lumotlarini Google serverlaridan to‘liq ajratib turadi.
Apple va Google bu kelishuvni ommaviy ravishda reklama qilmaslikka qaror qilgan. Google faqat texnik ta’minlovchi sifatida faoliyat ko‘rsatadi — Safari brauzeridagi qidiruv kelishuvidan farqli ravishda.
Sarmoya bozoridagi reaksiya ijobiy bo‘ldi: Apple aksiyalari 0,9 foizga, Alphabet esa 3,2 foizga qimmatlashdi. Tahlilchilarning fikricha, bu hamkorlik Apple'ning sun’iy intellekt sohasidagi ortda qolishini bartaraf etishga yordam berishi mumkin.
Shu bilan birga, Apple o‘zining ichki modelini rivojlantirishni davom ettiradi va kelgusida Gemini'ni to‘liq almashtirishni maqsad qilgan. Ammo ekspertlar bu oson bo‘lmasligini, chunki Google'ning 2.5 Pro versiyasi hozirda ko‘plab LLM reytinglarida yetakchi ekanini ta’kidlamoqda.
Apple Xitoy bozori uchun esa Gemini'dan foydalanmaydi — mamlakatda Google xizmatlari taqiqlangan. Bu bozorda kompaniya Alibaba va Baidu bilan mahalliy SI filtr tizimlarini ishlab chiqish bo‘yicha muzokara olib bormoqda.
