Тошкентда юқори қувватда ишлаётган корхоналар улуши 43 фоиздан 61 фоизга ошди

Тошкент шаҳри ва вилоятида бизнес фаоллиги сезиларли ошган. 2026 йил II чорагида юқори қувватда ишлаётган корхоналар улуши бир йилда 43 фоиздан 61 фоизга етган.

Бу ҳақда Марказий банкнинг 2026 йил II чорак якунлари бўйича бизнес кайфияти шарҳида маълум қилинди.

Ҳудудда сўровда қатнашган тадбиркорларнинг 53 фоизи бизнес шароитлари яхшиланганини билдирган. Бу кўрсаткич ўтган йилнинг мос даврига нисбатан бироз ошган.

Тадбиркорлар банк хизматлари сифати, кредит олиш имкониятлари, рақобат муҳити ва лицензия олиш жараёнларида ижобий ўзгаришлар кузатилганини қайд этган.

Бироқ солиқ маъмурчилиги, йўл инфратузилмаси, газ ва электр таъминоти ҳамда монополлашув даражасида сезиларли ўзгариш бўлмаган. Тадбиркорлар ушбу йўналишлардаги шароитларни нисбатан паст баҳолаган.

Буюртмалар ва ишлаб чиқариш ҳажми ошди

II чоракда буюртмалар ҳажми ошганини билдирган тадбиркорлар улуши ўтган йилнинг мос даврига нисбатан 4 фоиз бандга, ишлаб чиқариш ҳажми ошганини айтганлар улуши эса 7 фоиз бандга кўпайган.

Буюртмалар асосан қурилиш, туризм, ҳунармандчилик ва савдо соҳаларида ошган.

Бизнес фаоллигининг ортиши меҳнат бозорига ҳам таъсир қилган. Қўшимча ишчи кучига талаб ошганини билдирган тадбиркорлар улуши бир йил аввалгига нисбатан бироз кўпайган.

Корхоналарга нима тўсқинлик қилмоқда?

Юқори қувватда ишламаётган корхоналар газ ва электр таъминотидаги узилишлар, талабнинг етарли эмаслиги, автомобиль ёқилғиси нархининг ошиши ҳамда логистикадаги узилишларни асосий чекловлар сифатида қайд этган.

Шу билан бирга, кредит тўловлари ошганини билдирган тадбиркорлар улуши ўтган йил даражасида қолган. Қурилиш, ҳунармандчилик, қишлоқ хўжалиги ва молия соҳаларида эса қўшимча кредит ресурсларига талаб юқори бўлган.

Тадбиркорлар келажакка ишонч билан қарамоқда

Келгуси чорак учун бизнес кутилмалари ҳам бироз яхшиланган. Сўровда қатнашган тадбиркорларнинг 51 фоизи буюртмалар ҳажми ошишини кутмоқда.

Буюртмаларнинг асосан қурилиш, ишлаб чиқариш, ҳунармандчилик ва қишлоқ хўжалиги соҳаларида ўсиши прогноз қилинган. Бу эса корхоналарнинг фаолиятини кенгайтириш ва қўшимча ишчи кучига эҳтиёжини ошириши мумкин.

Тадбиркорларнинг ўрта муддатли иқтисодий кутилмалари ҳам яхшиланган. Сўровда қатнашганларнинг 82 фоизи келгуси уч йилда мамлакат иқтисодиёти ва бизнес муҳити яхшиланишига ишонч билдирган.

Vaqt.uz аввалроқ айни сўровномада тадбиркорларнинг 42 фоизи қарз мажбуриятлари ошганини билдиргани ҳақида хабар берганди.