Kambag‘al aholisi ko‘p viloyatlar, avtomobillar uchun oshgan bojlar va ayollarning oila qurish yoshi — 6-yanvar dayjesti

1-fevraldan gaz va elektr uchun subsidiyani onlayn olish mumkin

2026 yil 1-fevraldan boshlab muhtoj oilalar gaz va elektr energiyasi xarajatlari uchun subsidiyani onlayn shaklda olishlari mumkin bo‘ladi. Vazirlar Mahkamasining 2025 yil 31-dekabrdagi qaroriga ko‘ra, endilikda kompensatsiya uchun murojaat qilish jarayoni soddalashtirilib, arizalarni Yagona milliy ijtimoiy himoya tizimi yoki Yagona interaktiv davlat xizmatlari portali (my.gov.uz) orqali topshirish imkoniyati yaratildi.

Biroq, subsidiya berishda qat’iy talablar mavjud: agar oila tasarrufida ikki yoki undan ortiq avtomobil, ikki va undan ortiq ko‘chmas mulk yoki yer uchastkasi bo‘lsa, to‘lov rad etiladi. Arizalar har oyning 16-kuniga qadar qabul qilinib, avtomatik tarzda ko‘rib chiqiladi va tasdiqlangan mablag‘lar oyning 27-kunigacha fuqarolarning bank kartalariga o‘tkazib beriladi.

O‘zbekistonning qaysi hududlarida kambag‘al aholi soni ko‘proq?

2025 yil yakunlariga ko‘ra, O‘zbekistonda kambag‘allik darajasi rekord darajada — 5,8 foizgacha pasaydi, biroq Samarqand viloyati 265 ming nafar ehtiyojmand aholi bilan respublikada hali ham yetakchilik qilmoqda. Kuchli uchlikdan Farg‘ona (239 ming) va Qashqadaryo (238 ming) viloyatlari joy olgan. Statistika qo‘mitasi ma’lumotlariga ko‘ra, mamlakat bo‘yicha jami kambag‘al aholi soni 2,2 million nafarni tashkil etmoqda.

Shu bilan birga, aholi daromadlari o‘rtasidagi tengsizlik kamayib, boy va kam ta’minlanganlar o‘rtasidagi farq 5,7 baravargacha tushgan. Kambag‘allikni qisqartirishda «Xitoy tajribasi» asosidagi yangi yondashuvlar va tadbirkorlikka ajratilgan 127 trillion so‘mdan ortiq kreditlar muhim rol o‘ynadi. Eng katta ijobiy o‘zgarish Jizzax va Xorazm viloyatlarida kuzatilib, ehtiyojmandlar ulushi qariyb ikki barobarga qisqardi.

Farg‘onada o‘qituvchilarni navbatchilikka majburlagan direktor ishdan olindi

Farg‘ona viloyati Buvayda tumanidagi 37-maktabda o‘qituvchilarni 13 kun davomida tun-u kun navbatchilik qilishga majburlagan direktor vazifasini bajaruvchi X.N. lavozimidan ozod etildi. Maktab rahbari tomonidan chiqarilgan buyruqda pedagoglar 25-dekabrdan 6-yanvarga qadar "xavfsizlikni ta’minlash" vaji bilan maktabda qolishlari belgilangan edi. Ushbu holat ijtimoiy tarmoqlarda keskin e’tirozlarga sabab bo‘ldi.

Viloyat Maktabgacha va maktab ta’limi boshqarmasi o‘tkazgan tekshiruv natijasida navbatchilik pedagoglarning lavozim majburiyatlariga kirmasligi va buyruq noqonuniy ekani tasdiqlandi. Tizimdagi boshqa rahbarlar ham o‘qituvchilarga qo‘shimcha vazifa yuklamaslik bo‘yicha qat’iy ogohlantirildi. Boshqarma ushbu voqeani butun tizimga tatbiq etmaslikni so‘rab, pedagoglar huquqi himoya qilinishini ta’kidladi.

O‘zbekistonda kichik litrajli avtomobillar uchun bojlar oshdi

2026 yil 1-yanvardan boshlab O‘zbekistonda dvigatel hajmi kichik (1000 va 1200 sm kubgacha) bo‘lgan yangi avtomobillar importi uchun berilgan bojxona imtiyozlari muddati tugadi. 2023 yilda bozorda raqobatni oshirish maqsadida joriy etilgan "nol" va 5 foizlik stavkalar o‘rnini endi standart bojxona to‘lovlari egalladi. Bu esa kichik litrajli mashinalarning bojxona qiymati sezilarli darajada oshishini anglatadi.

Yangi qoidalarga ko‘ra, dvigatel hajmi 1000 sm kubgacha bo‘lgan avtomobillar uchun 15 foiz boj va har bir sm kub uchun 0,4 dollar, 1200 sm kubgacha bo‘lganlar uchun esa 15 foiz boj va har bir sm kub uchun 0,6 dollar miqdorida to‘lov undiriladi. Ekspertlarning fikricha, imtiyozli davr tugashi natijasida ushbu segmentdagi avtomobillarning umumiy to‘lov yuklamasi yana avvalgi yuqori darajasiga qaytadi.

O‘zbekistonda ayollar asosan necha yoshda turmush qurmoqda?

Milliy statistika qo‘mitasi ma’lumotlariga ko‘ra, 2025 yilning yanvar-sentabr oylarida O‘zbekistonda jami 177 017 ta nikoh qayd etilgan.

Qayd etilgan nikohlarda ayollarning yosh guruhlari bo‘yicha taqsimlanishi quyidagicha:

20 yoshgacha – 65 078 nafar (36,8 foiz)

20-30 yosh – 94 765 nafar (53,5 foiz)

31-40 yosh – 13 137 nafar (7,4 foiz)

41 yosh va undan kattalar – 4 037 nafar (2,3 foiz).