Tramp Putin bilan qachon uchrashishni xohlayotganini aytdi
U «sakkizta urushni to‘xtatganini» ham iddao qildi.
© AP Photo / Julia Demaree NikhinsonAQSH prezidenti Donald Tramp Vladimir Putin bilan uchrashishni xohlashini, ammo bu uchrashuv faqat «urush yakuniga yaqinlashganda» bo‘lishi kerakligini aytdi. Bu haqda Oq uy rahbari jurnalistlarning savollariga javob berdi.
«Qarang, aslida bu urush umuman bo‘lmasligi kerak edi. Agar 2020-yilgi saylovlar soxtalashtirilmaganida, bu urush ham bo‘lmas edi. Va to‘rt yil davomida urush bo‘lmadi. Bilasizmi, men 2016-yildan 2020-yilgacha prezident bo‘lganman. Putin bilan gaplashganman, ammo urush sodir bo‘lmadi. Bunga umuman imkon yo‘q edi. Men lavozimdan ketganimdan keyin esa nima bo‘layotganini ko‘rdim», — dedi u.
Amerika prezidenti urushni «aqldan ozganlik» deb atadi.
«Urush hech qachon bo‘lmasligi kerak edi. Har oy 25 ming askar halok bo‘lmoqda. Tasavvur qilyapsizmi? 25 ming kishi. Bu xuddi butun bir stadion degani. Ukrainalik va rossiyalik askarlarning juda katta qismi halok bo‘lmoqda. Ular bu ahmoqona urushni to‘xtatishi kerak», — dedi u.
Donald Tramp «sakkizta urushni to‘xtatganini» iddao qildi.
«Sakkizta. Ularning ayrimlarini to‘xtatish bu urushni to‘xtatishdan ham ancha qiyinroq deb hisoblash mumkin edi, ammo men ularni to‘xtatdim. Biroq ikki prezident o‘rtasida juda katta adovat bor. Juda katta adovat. Ammo menimcha, hammasi allaqachon ancha yaqinlashdi. Vaqti kelmoqda. Aftidan, ularda yangi kuch paydo bo‘lganga o‘xshaydi. Men ikkalasi bilan ham ishlayapman va ular bu urushni to‘xtatadi, deb o‘ylayman», — dedi u.
Oq uy rahbari Rossiya prezidenti bilan sammit o‘tkazishni xohlashini, ammo bu «tinchlik kelishuvini tuzishga tayyor vaqt bo‘lganda» amalga oshirilishini qo‘shimcha qildi.
«Men Rossiya bilan ham, Ukraina bilan ham — umuman hamma bilan yaxshi munosabatlarga ega bo‘lishimizni xohlayman. Bu biznes uchun juda yaxshi bo‘lardi. Rossiyaning hududi juda katta va u yerda juda qimmatli yerlar bor.
Biz uchrashuv o‘tkazishimiz mumkin. Ishoning, men buni darhol amalga oshira olaman. Lekin uchrashuvni urush yakuniga yaqinlashganda o‘tkazishni xohlayman. Va menimcha, shunday bo‘ladi», — deya xulosa qildi u.
Eslatib o‘tamiz, avvalroq Putin va Tramp qariyb 90 daqiqa telefonda suhbatlashgandi.
