2025 йилда 9 млн литрга яқин сифатсиз ёнилғи савдосининг олди олинган

2025 йилда Ўзбекистонда нефт маҳсулотлари сифати устидан олиб борилган кенг кўламли текширувлар натижасида 247 та хўжалик юритувчи субъектда ёнилғи давлат стандарт талабларига жавоб бермаслиги аниқланди. Бу ҳақда Ўзенергоинспексия маълум қилди.

Аҳолини сифатли ва экологик тоза ёнилғи билан таъминлаш мақсадида инспекция ҳузуридаги назорат-кимё лабораториялари томонидан мамлакат ҳудудларида мунтазам равишда жойларда текширув ва лаборатория таҳлиллари ўтказиб келинмоқда. Ушбу тадбирлар нефть маҳсулотларининг таркиби, сифати ва техник регламентларга мувофиқлигини аниқлашга қаратилган.

Хусусан, 2025 йил давомида олиб борилган назорат тадбирлари доирасида 799 та автомобилларга ёнилғи қуйиш шохобчалари ҳамда турли корхоналардан жами 2 минг 289 та ёнилғи намунаси олинган. Олинган намуналар махсус лабораторияларда чуқур таҳлил қилинган.

Таҳлил натижаларига кўра, 247 та субъектда жами 8 миллион 962 минг литр нефт маҳсулотлари давлат стандарт талабларига жавоб бермаслиги, яъни сифатсиз экани аниқланган. Мазкур ёнилғиларнинг истеъмолчиларга сотувга чиқарилиши ўз вақтида тўхтатилган.

Аниқланган қонунбузарликлар юзасидан хўжалик юритувчи субъектларга маҳсулот сифати ва техник кўрсаткичларни тиклаш бўйича мажбурий кўрсатмалар берилган. Шу билан бирга, ушбу кўрсатмаларнинг ўз вақтида ва тўлиқ бажарилиши инспекция томонидан алоҳида назоратга олинган.

Масъул идора эслатишича, техник регламент талабларига жавоб бермайдиган, шунингдек, меъёрдан ортиқ заҳарли моддалар чиқишига сабаб бўладиган ёнилғи-мойлаш материалларини ишлаб чиқариш ёки реализация қилиш қонунчиликка зид ҳисобланади. Бундай ҳолатлар учун амалдаги қонун ҳужжатларига мувофиқ қатъий жавобгарлик чоралари белгиланган.

Маълумот ўрнида, 2025 йил декабр ойи бошида Ўзбекистондаги ёнилғи қуйиш шохобчаларида АИ-80 бензини савдосига қарши кенг кўламли рейдлар бошланган эди.