Алишер Усмонов «Эвертон» клубини сотиб олмоқчи
Асли ўзбекистонлик миллиардернинг Англия футболига сармоя киритиш бўйича тажрибаси бор. У Фарҳод Мошири билан дастлаб Лондоннинг «Арсенал» клубидан 14,58 фоиз улуш сотиб олган. Кейинчалик улар клубдаги ўз улушларини сотишган.
© BloombergРоссиялик тадбиркор, асли Ўзбекистондан бўлган Алишер Усмонов Англия Премер-лигасида иштирок этадиган «Эвертон» футбол клубини сотиб олиш имкониятини кўриб чиқмоқда. Бу ҳақда Буюк Британиянинг «talkSPORT» нашри журналисти Алан Брейзил маълум қилди.
«Мен бу маълумотни аниқ тасдиқлай олмайман, аммо Усмоновнинг “Эвертон”га қайтишга ҳаракат қилаётгани ҳақида гап-сўзлар етиб келди. Унинг жуда, жуда катта маблағи бор. Чамаси, жаноб Усмонов имкони бўлса, “Эвертон”га қайтиб, клубга катта миқдорда пул сармоя киритмоқчи», — деди Брейзил.
Аввалроқ АҚШнинг «The Friedkin Group» компанияси клубнинг назорат пакетини сотишга тайёрлигини билдирган эди. Ушбу холдингни бойлиги 7,8 миллиард долларга баҳоланган миллиардер Дэн Фридкин бошқаради. «Forbes» маълумотларига кўра, Алишер Усмоновнинг бойлиги эса 14 миллиард долларга баҳоланган.
«The Friedkin Group» 2024-йилда ўзининг Буюк Британиядаги «Roundhouse Capital» компанияси орқали «Эвертон» клубининг 94 фоиз акциясини сотиб олган. Англия оммавий ахборот воситалари ушбу келишув қийматини 400 миллион фунт стерлинг ёки 500 миллион доллар атрофида баҳолаган.
Америкалик компаниянинг бошқа активлари қаторида Италиянинг «Рома» ва Франциянинг «Канн» футбол клублари ҳам бор.
Усмоновнинг Англия футболига сармоя киритиш бўйича аввалги тажрибаси ҳам бор. У британиялик ва эронлик менежер Фарҳод Мошири билан ҳамкорлик қилган. Дастлаб улар Лондоннинг «Арсенал» клубидан 14,58 фоиз улуш сотиб олган. Кейинчалик клубдаги ўз улушларини сотишган ва 2017-йилда 11 миллион фунт стерлинг эвазига «Эвертон»нинг эгаларига айланишган.
Фарҳод Мошири 2024-йилгача клубни бошқарган. Кейин эса «Эвертон» назоратини америкалик инвесторлар қўлга олган.
Сентябр ойида Европа Иттифоқи Алишер Усмоновга нисбатан жорий этилган санкцияларни бекор қилди. Бироқ унинг «USM Holdings» компаниясига нисбатан Буюк Британия томонидан 2023-йилдан бери амал қилиб келаётган чекловлар сақланиб қолмоқда.
Айни пайтда «Эвертон» Англия Премер-лигаси жадвалида 5-ўринни эгаллаб турибди.
Эслатиб ўтамиз, аввалроқ «Манчестер Сити» молиявий фирибгарликда айбдор деб топилганди. Клуб умумий қиймати $1,2 млн бўлган молиявий қоидабузарликларда айбланмоқда.
