Амир Темур хиёбони атрофида ерусти пиёдалар ўтиш йўллари қайта жорий этилади
Пойтахт марказида транспорт ва пиёдалар ҳаракатини яхшилаш мақсадида янги «ақлли» светофорлар ва хавфсизлик оролчалари ўрнатилади.
Тошкентдаги Амир Темур хиёбони атрофида пиёдалар ўтиш жойларини қайта ташкил этиш бўйича йирик лойиҳа амалга оширилади. Бу ҳақда Йўл ҳаракатини ташкил этиш маркази маълум қилди.
Ушбу лойиҳа транспорт ҳаракати схемасини такомиллаштириш орқали автомобиллар оқимини оптималлаштириш билан бирга, ҳудудда пиёдалар хавфсизлигини оширишни мақсад қилган.
Янги ечимлар
Лойиҳа доирасида Сайилгоҳ кўчасидан (Бродвей) хиёбонга олиб ўтувчи қисмда жойлашган металл тўсиқлар тўлиқ олиб ташланади. Уларнинг ўрнига замонавий «ақлли» светофорлар ўрнатилиб, пиёдалар ҳаракати тартибга солинади.
Шунингдек, Махтумқули кўчаси томонида, Форумлар саройи яқинида, Амир Темур кўчаси ва Темурийлар тарихи давлат музейи кириш қисмида хавфсизлик оролчалари барпо этилади. Бу ерларда тартибга солувчи светофорлар ҳам жорий қилинади.
Қўшимча имкониятлар
Темурийлар тарихи музейи ҳамда Ўзбекистон меҳмонхонаси ёнида туристик автобуслар учун махсус тўхташ жойлари ташкил этиш режалаштирилган. Бу эса сайёҳлар учун қулайликни оширишга хизмат қилади.
Мутахассислар ҳисоб-китобига кўра, ушбу ўзгаришлар амалга оширилгандан сўнг айлана йўлнинг ўтказувчанлик қобилияти соатига 5,6 мингтадан 6 мингтагача автомобилгача ошиши кутилмоқда.
