АҚШнинг Саудия нефти импорти 1985-йилдан бери илк бор нолга тушди

Америка Қўшма Штатлари 1985-йилдан бери биринчи марта Саудия Арабистонидан нефть импорт қилишни тўлиқ тўхтатди. Июль ойи якунларига кўра, мамлакатга Саудия нефтидан бирорта ҳам баррел етказиб берилмаган. Бу ҳақда «Bloomberg» АҚШ Энергетика вазирлиги маълумотларига таяниб хабар берди.

Маълумотларга кўра, 2026-йил бошида АҚШ Саудия Арабистонидан кунига 800 минг баррелдан ортиқ нефть импорт қилган. Кейинчалик эса ушбу етказиб беришлар тўлиқ тўхтатилган. Бу ҳолатга АҚШ ва Эрон ўртасидаги можаро ҳамда Ҳормуз бўғозининг ёпилиши сабаб бўлгани айтилмоқда.

Саудия нефти импорти тўхтагач, АҚШ нефтни қайта ишлаш заводлари бошқа манбаларга ўтган. Жумладан, улар мамлакатнинг ўзида қазиб олинаётган енгил нефть улушини оширган, шунингдек, Венесуэладан нефть импорт қилишни кўпайтирган. Агар йил бошида Венесуэладан кунига тахминан 100 минг баррел нефть келтирилган бўлса, кейинчалик бу кўрсаткич 600 минг баррелгача етган.

Шу билан бирга, «Kpler» таҳлилчилари август ойида АҚШга Саудия нефтини импорт қилиш қисман қайта тикланиши мумкинлигини айтмоқда. Уларнинг баҳолашича, етказиб бериш ҳажми кунига тахминан 300 минг баррелга етиши мумкин.

Эслатиб ўтамиз, аввалроқ Россияда нефтни қайта ишлаш ҳажми 20 йиллик энг паст даражага тушганди.