Банклар нақд пул ечиб олишда банкоматда қанча олиб қолади?
Uzcard ва HUMO карталаридан банкомат орқали нақд пул ечишда аксарият банкларда комиссия — 1 фоиз. Маълум суммагача комиссия олмайдиган банклар ҳам бор. Нақд пул ечишдан олдин карта тури, ойлик лимит, акция муддати ва банкоматда кўрсатилган якуний комиссияни текшириш керак.
© Foto: rg.ruЎзбекистонда банкларнинг 2026-йил 9-ноябр ҳолатига очиқ эълон қилинган тарифларига кўра, Uzcard ва HUMO карталаридан банкомат орқали нақд пул ечиш учун аксарият банкларда 1 фоиз комиссия белгиланган.
Бироқ айрим банкларда ўз карталари учун бундан паст ставкалар ҳам мавжуд. Масалан, «Davrbank»нинг банкоматларидан пул ечиб олинаётганда нақдлаштириб олинаётган пулнинг 0,5 фоизи комиссия учун олиб қолинади. Банк томонидан чиқарилган Uzcard ва HUMO карталаридан ўз банкоматлари орқали нақд пул ечилганда 0,5 фоиз комиссия олинади.
«Asakabank»да бу хизмат 0,7 фоиз қилиб қўйилган. Банкнинг айрим Uzcard ва HUMO карталари учун ўз банкоматларида 0,7 фоиз комиссия белгиланган. Масалан, Uzcard Black картасида ушбу ставка амал қилади.
«Garant bank» эса ўзининг Uzcard ва HUMO карталаридан нақд пул ечиш учун 0,7 фоиз, бошқа банкларнинг ушбу карталаридан эса 1 фоиз комиссия олади.
«Ўзмиллийбанк», «Халқ банки», «Агробанк», «Ўзсаноатқурилишбанк», «Бизнесни ривожлантириш банки», «Микрокредитбанк», «Туронбанк», «Алоқабанк», «Ипотека-банк», «Ҳамкорбанк», «Ипак Йўли банки», «Трастбанк», «Капиталбанк», «Анорбанк», «Asia Alliance Bank», «Infinbank», «Octobank», «Universalbank», «Пойтахт банк», «Orient Finans Bank», «APEX BANK» ва «Tenge Bank» банкларида Uzcard ва HUMO карталаридан нақд пул ечишнинг асосий банкомат тарифи 1 фоиз атрофида бўлиб, айрим карта маҳсулотлари ва махсус шартларда фарқ қилиши мумкин.
Комиссиясиз нақд пул ечиш имконияти қайси банкларда бор?
«TBC Bank»нинг 1-ноябрдан амал қилаётган янги карта пакети доирасида Visa ҳамда қўшимча Uzcard ёки HUMO карталарининг ҳар бири учун ойига 5 миллион сўмгача нақдлаштириш комиссияси қайтарилади. Алоҳида Uzcard тарифи бўйича 10 миллион сўмгача имтиёз ҳам мавжуд.
«Uzum Bank»нинг ўз банкоматларидан ойига 10 миллион сўмгача 0 фоиз комиссия билан пул ечиш мумкин. Бошқа банк банкоматларида эса акция шартлари бажарилса, 2 миллион сўмгача нақдлаштириш комиссияси 15 дақиқа ичида кешбек сифатида қайтарилади. Акция жорий йил 1-июндан амал қилмоқда.
Қолаверса, «Kapitalbank»нинг ўз банкоматларида ойига 10 миллион сўмгача 0 фоиз, ундан юқори сумма учун 0,7 фоиз комиссия белгиланган.
«Hamkorbank»нинг ўз банкоматларидан ойига 3 миллион сўмгача 0 фоиз, лимитдан юқори сумма учун 1 фоиз комиссия олинади.
Шунингдек, «InfinBANK». Банкнинг ўз банкоматларида нақдлаштириш 0 фоиз. Бироқ Classic Zero учун ойига 1 доллар, Platinum Zero учун 5 доллар абонент тўлови бор. Мос равишда 200 ва 1000 долларлик минимал қолдиқ сақланса, абонент тўлови ундирилмайди.
Uzcard ва HUMO карталарининг одатдаги комиссиялари билан Visa каби махсус карталарга берилган имтиёзларни адаштирмаслик керак. Шунингдек, 0 фоиз комиссия ва кейинчалик комиссияни кешбек сифатида қайтариш турли шартлар ҳисобланади. Нақд пул ечишдан олдин карта тури, ойлик лимит, акция муддати ва банкоматда кўрсатилган якуний комиссияни текшириш керак.
Эслатиб ўтамиз, аввалроқ Марказий банк банк ва тўлов ташкилотларини банкомат пул ечмаган ҳолатларни холис текширишга чақирганди. Шунингдек, Ўзбекистон банкоматлар импортидан воз кечиши мумкин.
