Dam olish kunlari iliq ob-havo kutilmoqda

O‘zbekistonda dam olish kunlari iliq ob-havo bo‘lishi kutilmoqda. Bu haqda “O‘zgidromet” xabar berdi.

Ma’lumotlarga ko‘ra, juma kuni Toshkent viloyati va Farg‘ona vodiysining ayrim hududlarida qisqa muddatli yomg‘ir yog‘adi. Boshqa hududlarda yog‘ingarchilik kutilmaydi. Havo harorati +13...+18 daraja iliq bo‘ladi.

Shanba va yakshanba kunlari mamlakatning ko‘plab hududlarida yog‘ingarchiliksiz ob-havo bo‘ladi, faqat Toshkent, Samarqand, Jizzax va Sirdaryo viloyatlarining ayrim joylarida qisqa muddatli yomg‘ir va momaqaldiroq bo‘lishi mumkin.

Yakshanba, 19-aprel kuni Farg‘ona vodiysining ayrim hududlarida ham biroz yomg‘ir yog‘ishi mumkin.

Yakshanba, 19-aprel kuni respublikaning shimoli-g‘arbiy hududlarida ba’zi joylarda sekundiga 15-20 metrgacha shamol esishi kutilmoqda, chang-to‘zonlar kuzatilishi mumkin.

Dam olish kunlari harorat asta-sekin ko‘tariladi va yakshanba kuni kunduzgi harorat 20-25 daraja ga, janubda esa 26-28 daraja ga ko‘tariladi.

Respublikaning tog‘li hududlarida 17-19-aprel kunlari vaqti-vaqti bilan yomg‘ir yog‘adi, baland tog‘li hududlarda yog‘ingarchilik (yomg‘ir, qor) bo‘ladi.

Respublikaning tog‘ oldi va tog‘li hududlarida sel-suv toshqin hodisalari yuzaga kelishi mumkin.

Toshkent shahrida juma va dam olish kunlari davomida biroz yomg‘ir yog‘ishi mumkin. Juma kuni harorat +14...+16 daraja, shanba kuni +19...+21 daraja va yakshanba kuni +21...+23 daraja iliq bo‘ladi. Sharqiy shamollar biroz esib turadi.