Депозитлар қайси банкларда кўпроқ ошмоқда?
2026-йилнинг I чорагида «Ориент финанс банк»дан ташқари барча банклар депозит портфелида ўсиш кузатилди. «Octobank» энг юқори саркашни қайд этди.
Ўзбекистон банк тизими жадал ривожланишда давом этмоқда. 2025-йилнинг биринчи чорагидан 2026-йилнинг мос даврига қадар банклардаги жами депозитлар ҳажми 30,88 фоизга ўсиб, 324,1 трлн сўмдан 424,2 трлн сўмга етди.
Бу ўсиш аҳоли ва бизнеснинг банк тизимига бўлган ишончи ортаётганини ҳамда иқтисодиётдаги ликвидлик кўпайганини кўрсатади.
Солиштирилаётган даврда «Миллий банк» депозитлар бўйича етакчиликни сақлаб қолди. Банкнинг депозит портфели 38 трлн сўмдан 53,4 трлн сўмгача ўсди.
«Капиталбанк» ҳам 44,9 трлн сўм билан иккинчи ўринда қолди. «Агробанк» эса депозитларини 21,5 трлн сўмдан 34,9 трлн сўмга кўпайтириб, олтинчи поғонадан учинчи поғонага кўтарилди.
Бу учта банк мамлакатдаги депозитларнинг 30 фоизини назорат қилмоқда.
Рейтингда ўрин бўйича энг юқори ўсишни «Octobank» қайд этди. Банк депозитлари 2025 йилнинг биринчи чорагига нисбатан 416 фоизга ошиб, 13,9 трлн сўмга етди. Натижада банк ўз ўрнини 22 поғонадан 12 поғонага мустаҳкамлади.
«Octobank» депозит портфели ўсиши бизнес учун берилаётган депозитлар ҳисобига шаклланди. Бир йилда банкнинг корпоратив депозитлари 2 трлн сўмдан 13,4 трлн сўмгача ўсди.
Депозитлар миқдори бўйича энг юқори ўсиш эса «Миллий банк» (+15,4 трлн) ва «Агробанк»да (+13,3 трлн) кузатилди. «Octobank» бу борада учинчи бўлди.
Рақамли экотизим имкониятларидан фойдаланган ҳолда «Uzum Bank» ҳам депозитлар миқдорини сезиларли оширишга эришди — 72,7 млрд сўмдан 1,2 трлн сўмгача.
Бундан ташқари, «Аво банк», «Garant bank», «Ҳаёт банк» ва «Apex bank» ҳам ўтган йилнинг мос даври билан солиштирилганда депозитларини яхшигина оширишга муваффақ бўлди.
«Ориент финанс банк» депозит портфели 9,6 фоизга ёки қарийб 1,1 трлн сўмга камайди ва пасайиш кўрсатган мамлакатдаги ягона банк бўлди.
