Gaz yo‘qotishlarini kamaytirishga 10,6 mln dollar ajratildi
Ajratilgan mablag‘ning 9,6 mln dollar qismi gaz yo‘qotishlarini kamaytirishga, qolgan 1 mln dollar esa monitoring va loyihani amalga oshirish xarajatlariga yo‘naltiriladi.
© kapital.kzO‘zbekistonda gaz infratuzilmasidagi sizib chiqishlarni aniqlash va bartaraf etish, metan chiqindilarini qisqartirishga qaratilgan loyiha amalga oshiriladi. Vazirlar Mahkamasining 2026 yil 18-avgustdagi 444-son qarori bilan uni amalga oshirish chora-tadbirlari tasdiqlangan.
Loyiha 2026–2028 yillarga mo‘ljallangan bo‘lib, uni moliyalashtirish uchun jami 10,6 million AQSH dollari ajratilgan.
Asosiy mablag‘ gaz yo‘qotishlariga qarshi kurashga sarflanadi
Ajratilgan mablag‘ning 9,6 million dollar qismi gaz infratuzilmasidagi mavjud yo‘qotishlarni aniqlash va kamaytirishga qaratilgan tadbirlarga yo‘naltiriladi.
Yana 500 ming dollar gaz sizib chiqishi va metan chiqindilarini monitoring qilish, shuningdek, hisobot berish tizimidagi institutsional salohiyatni mustahkamlash uchun sarflanadi.
Qolgan 500 ming dollar esa loyihani amalga oshirish guruhi faoliyati, xorijiy ekspertlarni jalb qilish va boshqa qo‘llab-quvvatlash tadbirlariga ajratiladi.
«O‘ztransgaz» obyektlarida 1 000 dan ortiq sizib chiqish nuqtasi aniqlangan
Jahon banki ko‘magida avval o‘tkazilgan tadqiqotlar davomida «O‘ztransgaz» obyektlarida 1 000 dan ortiq nuqtada gaz sizib chiqishi aniqlangan.
Ushbu sizib chiqishlarning umumiy hajmi 35 million kub metrgacha baholangan. Yangi loyiha aynan shunday yo‘qotishlarni aniqlash, ularni bartaraf etish va metan chiqindilarini qisqartirishga qaratilgan.
Tejalgan metan mustaqil tekshiruvdan o‘tkaziladi
Loyiha natijasida tejalgan metan hajmlari mustaqil verifikatsiyadan o‘tkaziladi. Shundan keyin tejalgan resurslar hisobiga shakllangan mablag‘lar maxsus eskrou hisobvarag‘ida jamlanadi.
Bu mablag‘lar gaz tizimidagi sizib chiqishlarni aniqlash va bartaraf etish bo‘yicha keyingi tadbirlarni moliyalashtirishga yo‘naltirilishi ko‘zda tutilgan.
Idoralararo ishchi guruh tashkil etiladi
Loyihani amalga oshirish va muvofiqlashtirish uchun Iqtisodiyot va moliya vazirligi, Energetika vazirligi hamda «O‘ztransgaz» vakillaridan iborat idoralararo ishchi guruh tashkil etiladi.
Loyihaning asosiy maqsadi faqat gaz sizib chiqishlarini bartaraf etish bilan cheklanmaydi. Uning doirasida gaz yo‘qotishlarini hisoblash, tejalgan metan hajmlarini mustaqil baholash va hosil bo‘lgan mablag‘larni sohani yanada takomillashtirishga yo‘naltirish mexanizmini yaratish ham nazarda tutilgan.
