Ғазони энди ким бошқаради?

Фаластиннинг ҲАМАС ҳаракати Исроил билан уруш тугаганидан кейин Ғазо сектори бошқарувига чет эл аралашувига йўл қўймаслигини маълум қилди. Бу ҳақда ҲАМАС сиёсий бюроси аъзоси Усама Ҳамдан Al Arabi телеканалига берган интервюсида айтиб ўтди. "Ғазо секторини бошқариш миллий масала ва биз хорижий кучларнинг аралашишига йўл қўймаймиз", - дея таъкидлади Ҳамдан АҚШ президенти Доналд Трампнинг режасини шарҳлар экан. Режада ўт очишни тўхтатгандан сўнг халқаро кучларни эксклавга жойлаштириш талаб қилинган. Трампнинг режаси кейинги босқичда унинг раҳбарлигида Буюк Британия собиқ бош вазири Тони Блейр иштирокида халқаро ташкилот тузишни назарда тутади. ҲАМАС раҳбарияти урушдан кейин Ғазо секторини ташқи бошқарув ғоясини рад этди. Reuters манбаларига кўра, ҳаракат назоратни фақат Фаластин маъмурияти назорат қиладиган ва араб ва мусулмон давлатлари кўмагида бўлган Фаластин технократик ҳукуматига топширишга тайёр. Ғазо устидан назоратни ўз қўлига олиш учун халқаро кенгаш тузиш бўйича илк музокаралар шу ҳафта Парижда бўлиб ўтади. ҲАМАС музокараларга таклиф қилинмаган. ҲАМАС келишув доирасида Исроил ўз қўшинларини Ғазодан олиб чиқиб кетишини ва ҳар икки томон асирларни алмашишини эълон қилди. Ҳаракат, шунингдек, Трамп ҳамда кафил давлатлар – Туркия, Қатар ва Мисрни ўт очишни тўхтатиш шартларига риоя этилишини таъминлашга чақирди. Ҳаракат баёноти Исроил ва ХАМАС ўртасида 9 октябр куни Мисрда эришилган келишув фонида янгради. Ҳар икки томон Трампнинг тинчлик режасининг биринчи босқичига рози бўлди, яъни ўт очишни тўхтатиш ва гаровга олинганларни алмашиш. Битим Яқин Шарқдаги кучлар мувозанатини ўзгартирган икки йиллик ҳалокатли можарога барҳам бериши кутилмоқда. Трамп ўзининг Truth ижтимоий тармоғида келишувлар имзоланганини эълон қилиб, уларни “барқарор ва мустаҳкам тинчлик сари биринчи қадам” деб атади. Унинг таъкидлашича, барча гаровга олинганлар "тез орада" озод қилинади ва Исроил қўшинлари келишилган чизиққа чекинадилар. Исроил Бош вазири Бенямин Нетаняҳу ҳукумат яқин кунларда келишувни маъқуллашини тасдиқлади.