GM UzAuto Motors’ни хусусийлаштиришда устувор ҳуқуққа эга бўлмайди
Давактив UzAuto Motors ни хусусийлаштириш юзасидан қўшимча изоҳ берди. Савдоларда қонунчилик талабларига жавоб берадиган барча инвесторлар иштирок этиши мумкин.
© Ijtimoiy tarmoqlarUzAuto Motors’ни хусусийлаштиришда General Motors’га бошқа инвесторлар олдида устувор ёки алоҳида ҳуқуқ берилмайди. Бу ҳақда Давлат активларини бошқариш агентлиги Spot’га маълум қилган.
Агентликнинг билдиришича, қонунчилик талабларига жавоб берадиган ҳар қандай инвестор хусусийлаштириш жараёнида қатнашиши мумкин. Активни халқаро савдолар орқали сотиш ва жараённи очиқ ўтказиш режалаштирилмоқда.
«Қонунчилик талабларига жавоб берадиган ҳар қандай инвестор иштирок этиши мумкин — айрим компаниялар учун ҳеч қандай имтиёз ёки устувор ҳуқуқ назарда тутилмаган» , — дея маълум қилди Давактив.
Хусусийлаштириш жараёни қайси босқичда?
Ҳозиргача фақат UzAuto Motors ва UzAuto Motors Powertrain’ни сотиш бўйича тайёргарлик кўрилмоқда. Жараёнга халқаро маслаҳатчи Alvarez & Marsal жалб қилинган.
Маслаҳатчи хулосалари ва таклифлари олингач, Давактив халқаро тендерни расман эълон қилади. Агентлик изоҳда тендерни имкон қадар тезроқ ўтказишни режалаштираётганини билдирган, бироқ унинг аниқ санаси маслаҳатчининг ишларини якунлаши ва инвесторлар фаоллигига боғлиқ.
Хусусийлаштириш доирасида UzAuto Motors’нинг 99,7 фоиз ва UzAuto Motors Powertrain’нинг 100 фоиз улуши сотилади. Ҳар икки корхонани битта лот сифатида ёки алоҳида сотиш масаласи ҳам кўриб чиқилмоқда. Якуний формат эса консультант таклифлари асосида белгиланади.
GM билан келишув
Ҳозирда UzAuto Motors Chevrolet бренди остида автомобиллар ишлаб чиқаради. 2025 йил ноябрида Ўзбекистон ва АҚШ саноат ҳамда савдо соҳаларидаги ҳамкорликни кенгайтириш бўйича қатор келишувларга эришган.
Келишувларга кўра, уч йил давомида 5 млрд долларлик автомобиль бутловчи қисмларини импорт қилиш белгиланган. Шунингдек, UzAuto Motors’нинг савдоси ва хусусийлаштирилиши жараёнида ҳамкорликни кенгайтириш бўйича ишлар олиб борилиши кўзда тутилган.
«Ўзавтосаноат» ва General Motors ўртасида 2017 йил октябрида 10 йиллик альянс шартномаси имзоланган. Ҳужжат UzAuto Motors’га GM моделлари, Chevrolet бренди ва General Motors технологияларидан фойдаланиш, шунингдек, автомобилларни МДҲ давлатларига экспорт қилиш имконини берган. Бу ҳуқуқлар эвазига компания Америка томонига роялти тўлайди.
Масалан, UzAuto Motors’нинг 2024 йил учун молиявий ҳисоботида General Motors’га тўланган роялти миқдори 86 млн доллардан ошгани кўрсатилган.
Томонлар ўртасидаги амалдаги альянс шартномаси 2027 йилда ўз якунига етади.
