Gunvor раҳбари Россия билан алоқалар айблови ортидан истеъфога чиқмоқда

Gunvor Group'нинг асосий улушдори ва бош директори Торберн Торнквист истеъфога чиқади ва ўзининг назорат улушини компания ходимларига сотади. Бу ҳақда компания хабарида маълум қилинди.

Қайд этилишича, Торнквист кетганидан сўнг, компанияга унинг АҚШдаги бўлинмаси раҳбари Гери Педерсен бошчилик қилади.

Gunvor group'га кўра, ходимларнинг акцияларни сотиб олиш таклифи компания раҳбарияти томонидан 2022 йилдаги умумий йиғилишда илгари сурилган бўлган. Баёнотда айтилишича, Gunvor директорлар кенгаши ва ижроия қўмитасига энди Торнквистлар оиласи аъзолари ҳам, унинг вакиллари ҳам кирмайди. Шу билан бирга, компаниянинг четдан мулкдорлари бўлмайди.

«Бундай ўзгариш учун қулай пайт келди. Авлодлар алмашинуви жадал давом этмоқда ва бизда глобал стратегиямизни янада ривожлантириш учун зарур бўлган молиявий барқарорлик ва етакчилик салоҳияти мавжуд. Бизнинг мақсадимиз — бугун ҳам, келажакда ҳам дунё энергетика бозорининг ишончли ва рақобатбардош иштирокчиси сифатида етакчилик мавқеимизни сақлаб қолишдир», — дея изоҳ берди Педерсен.

Санкциялар остида қолган LUKOIL

АҚШ Молия вазирлиги яқинда LUKOIL ва унинг шўба тузилмаларини санкциялар рўйхатига киритган эди. Қўшма Штатлар компанияга операцияларни якунлаш учун бир ой муҳлат берди. Бу ҳолат ортидан LUKOIL ўзининг халқаро активларини сотиш режасини билдирганди.

Аввалроқ Швейцариянинг Gunvor Group трейдери «LUKOIL International GmbH»ни сотиб олиш бўйича таклиф берган, аммо 7 ноябр куни компания бу режадан воз кечганини маълум қилди. Бу қарор АҚШ Молия вазирлиги Gunvor'ни Россия билан алоқалар ҳақида огоҳлантирганидан кейин қабул қилинган.

Аввалроқ Яқинда АҚШ Молия вазирлиги Американинг янги санкциялар пакетига LUKOIL ва унинг шўба тузилмаларини киритди. Қўшма Штатлар LUKOIL ва унинг 50 фоизи ва ундан кўп улушга эга бўлган шўба корхоналари билан операцияларни якунлаш учун бир ой муҳлат берди. Шундан сўнг, LUKOIL чеклов чоралари жорий этилиши муносабати билан ўзининг халқаро активларини сотиш ниятида эканлигини маълум қилди.

30 октябр куни LUKOIL Gunvor group халқаро нефт трейдинг компаниясидан Россия компаниясининг хорижий активларига эгалик қилувчи LUKOIL International GmbH компаниясини сотиб олиш бўйича таклиф олганини эълон қилди. Таъкидлаш жоизки, Швецариянинг Gunvor Group хомашё трейдерига россиялик олигарх Геннадий Тимченко ва унинг швециялик ҳамкори Торберн Тернквист асос солган.

Бироқ, 7 ноябр куни Gunvor ўз таклифини қайтариб олишини маълум қилди. Компания ушбу баёнотни АҚШ Молия вазирлиги унинг Россия билан алоқалари ҳақида хабар берганидан ва Россия-Украина уруши давом этаётган бир пайтда Gunvor бизнес юритиш учун лицензия олмаслиги тўғрисида огоҳлантирганидан сўнг берди.

LUKOIL 11 мамлакатда, жумладан, Болгария, Руминия ва Нидерландиядаги нефтни қайта ишлаш заводлари, Европадаги АЁҚШ тармоғи, Озарбойжон, Қозоғистон, Ўзбекистон, Ироқ, Миср, БАА, шунингдек, Африка ва Лотин Америкаси мамлакатларидаги нефт қазиб олиш лойиҳалари каби активларга эгалик қилади.