Ҳонгконгдаги ҳалокатли ёнғин қурбонлари 146 нафарга етди

Ҳонгконгда сўнгги ўн йилликлардаги энг оғир ёнғин оқибатида қурбонлар сони 146 нафарга етди. Маълумотларга кўра, ҳалок бўлганларнинг 54 таси ҳали идентификация қилинмаган, шунингдек, 40 дан ортиқ киши бедарак деб ҳисобланмоқда. Фожиа жойи бўлган Тай По туманидаги 30 қаватдан баланд «Wang Fuk Court» турар-жой мажмуасида қидирув ва тозалаш ишлари бир неча ҳафта давом этиши кутилмоқда.

Расмийларнинг айтишича, ёнғиндан қолган блокларни текшириш «энг қийин босқич» бўлиб, конструкция хавфсизлиги тўлиқ баҳоланмагунча бутун мажмуа муҳрланган ҳолда қолади. Қутқарувчилар уйларнинг том қисмида ҳам жасадларни топганини маълум қилди.

Шанба куни Ҳонгконгда уч кунлик мотам эълон қилиниб, расмий тадбирлар бекор қилинди. Минглаб фуқаролар ёниб кетган бинолар яқинида қурбонларга ҳурмат бажо келтирди.

Ёнғин келиб чиқиш сабаблари бўйича 11 нафар шахс ҳибсга олинган. Фожиа содир бўлган пайтда мажмуада таъмирлаш ишлари олиб борилаётгани маълум қилинган ва рaсмийлар қурилиш материаллари ҳамда хавфсизлик стандартларига риоя этилганини текширмоқда.

Шу билан бирга, маҳаллий матбуотда ёритилишича, миллий хавфсизлик полицияси фалокатдан «фитна» мақсадида фойдаланишда гумон қилинган бир шахсни ҳибсга олгани айтилган. Хитойнинг Ҳонгконгдаги миллий хавфсизлик идоралари эса «Хитойга қарши бузғунчилар»ни фалокатдан сиёсий мақсадда фойдаланиб, 2019 йилдагига ўхшаш норозилик намойишларини қўзғатишга уринишдан қатъий огоҳлантирди.

Ҳукумат баёнотида айтилишича, ушбу фалокат билан боғлиқ «тартибсизлик келтирувчи» ҳаракатларга уринишлар қонунчилик асосида жазоланиши белгиланган. Маҳаллий ва марказий ҳукумат вазият ёмонлашмаслиги учун тезкор чоралар кўрмоқда.

Фожиа 1948 йилдан буён Ҳонгконгда содир бўлган энг йирик ёнғин сифатида қайд этилмоқда. Ҳонгконглик тадбиркорлари жабрланувчиларга ва уларнинг оилаларига хайрия маблағлари ажратишини маълум қилди. Шаҳар маъмурияти эса барча кўчирилган фуқаролар вақтинчалик турар-жой билан таъминланишини айтди.