iPhone’дан Vivo’гача: ўзбекистонликлар 9 ойда 3,2 млнта телефон сотиб олишди

Импортнинг асосий қисмини анъанавий тарзда Осиё давлатлари таъминламоқда: Хитой — 2 млн 488 минг 985 дона (бозорнинг қарийб 78 фоизи), Виетнам — 619 минг 249 дона, БАА — 65 минг 332 дона, Ҳиндистон — 31 минг 858 дона, Жанубий Корея — 4862 дона.

Қолган мамлакатлар ҳиссаси — атиги 2 минг дона атрофида.

Бундан кўринадики, Ўзбекистон мобил телефони бозори деярли тўлиқ Шарқ ишлаб чиқарувчилари қўлида. Айниқса, Хитой брендлари (Huawei, Xiaomi, Vivo, Realme, Infinix) ўз сегментларини мустаҳкам эгаллаб олган. Виетнам эса асосан Samsung ва Apple учун йиғув базаси вазифасини бажаради.

Доллар тушиб, талаб ошди

Импорт ўсиши — бу фақат техника бозоридаги фаоллик эмас, балки аҳолининг харид қобилияти тикланаётганига ҳам ишорадир.

Сўмнинг сўнгги ойларда нисбатан барқарор бўлиши, инфляция кутилмалари пасайиши ва истеъмол кредитларининг оммалашиши телефон сотиб олиш имкониятини кенгайтирмоқда.

Бугун телефон — шунчаки алоқа воситаси эмас. У ижтимоий мақом, ахборот кириш нуқтаси ва иқтисодий иштирок воситаси. Шу боис бу сегментдаги ҳар қандай ўзгариш — аҳолининг иқтисодий ишончи даражасини кўрсатади.

Нарх сегментлари ва рақобат

Кузатувларимизга кўра, Ўзбекистон бозорида ҳозирча учта асосий нарх сегменти шаклланган:

• Бюджет (150–250 доллар) — Infinix, Tecno, Redmi. Энг тез ўсувчи тоифа.

• Ўрта (300–600 доллар) — Xiaomi, Samsung A серияси, Vivo. Бозорнинг барқарор маркази.

• Премиум (800 доллар ва ундан юқори) — iPhone ва Samsung S-серияси. Улуши кичик, лекин барқарор.

Мутахассисларнинг фикрича, рақобат асосан ўрта сегментда кучаймоқда. Бу тоифа — ёшлар, офис ходимлари ва кичик тадбиркорларни қамраб олган энг фаол истеъмол қатлами.

Ишлаб чиқариш ҳам, сотиш ҳам — Осиё қўлида

Экспорт қилувчи давлатлар таркиби фақат логистика ёки нарх билан эмас, глобал ишлаб чиқариш занжири билан белгиланади.

• Хитой — ишлаб чиқариш базаси ва дунё брендига айланган марказ.

• Виетнам — Samsung ва Apple учун йиғув майдони.

• БАА — қайта экспорт маркази.

• Ҳиндистон — янги ишлаб чиқариш ҳудуди сифатида ўсмоқда.

Шунингдек, бу тенденция Ўзбекистон иқтисодиётининг ҳам глобал ишлаб чиқариш тизимига интеграциялашаётганини кўрсатади.

Телефон — янги иқтисодиёт рамзи

Мобил телефон импортдаги ўсиш фақат техник эҳтиёж эмас. Бу — рақамли иқтисодиёт ривожининг индикатори. Ҳар бир янги телефон — бу янги илова фойдаланувчиси, янги онлайн тўлов мижози, янги рақамли иштирокчи. Шунинг учун телефон бозорининг кенгайиши финтех, онлайн савдо ва банк хизматлари учун ҳам янги муҳит яратмоқда.

Телефон — энди вақт ўтказиш воситаси эмас, XXI асрнинг энг зарур меҳнат қуроли.