Жаҳонда нефт нархи 100 доллардан ошди
«Brent» нефти нархи 5 фоизга ошиб, 102 доллардан ошди. Яқин Шарқдаги можаро янги рекорд хавфини кучайтирмоқда.
26-март куни Лондоннинг «ICE Futures» биржасида «Brent» маркали нефтнинг июн ойи фючерслари нархи 5 фоизга ошди. Савдо якунларига кўра, бир баррел нархи 102,14 долларга етди.
Маълумот Тошкент вақти билан соат 17:51 да қайд этилган бўлиб, бундай кескин ўсиш сўнгги ҳафталардаги энг юқори динамикалардан бири бўлди.
Мутахассисларнинг фикрича, нархлар кўтарилишига Яқин Шарқдаги чўзилиб бораётган ҳарбий ҳаракатлар асосий омил бўлиб хизмат қилмоқда. Бу ҳолат глобал энергия таъминотида узилишлар хавфини кучайтиряпти.
Хавфли сценарий
Таҳлилчиларнинг таъкидлашича, Ҳўрмуз бўғози орқали нефт ташишдаги муаммолар бозорга жиддий таъсир кўрсатмоқда.
«Goldman Sachs» экспертлари агар мазкур йўналишдаги таъминот бир ойдан ортиқ муддатга қисқарса, «Brent» нефти нархи янада кескин ошиши мумкинлигини билдирган.
Уларнинг ҳисоб-китобларига кўра, бу ҳолат 2008-йилдаги тарихий рекорддан ҳам юқори кўрсаткичларга олиб келиши эҳтимоли бор.
Маълумотларга кўра, «Brent» нефтининг энг юқори нархи 2008-йил 11-июл куни қайд этилган. Ўшанда бир баррел нефт 147,5 долларгача кўтарилган.
Ўша пайтда ҳам бозор Яқин Шарқдаги геосиёсий беқарорликка сезиларли реакция билдирган.
Аввалроқ, Доналд Трамп маъмурияти нефт нархи баррелига 200 долларгача кўтарилиши мумкин бўлган иқтисодий сценарийларни кўриб чиқаётгани хабар қилинган эди.
