Камала Ҳаррис ҳамон сиёсатда эканини айтди: у ҳали президент бўлмоқчи

АҚШнинг собиқ вице-президенти Камала Ҳаррис BBC телеканалига берган интервьюсида сиёсатдан кетиш нияти йўқлигини ва келгусида президентликка номзодини қўйиши мумкинлигини маълум қилди.

«Мен ҳали сиёсат билан ишимни тугатганим йўқ. Бутун фаолиятимни жамият хизматига бағишлаганман — бу менинг қонимда бор», — деган у.

Интервю мазмунидан The Guardian нашри иқтибос келтирмоқда.

Ҳарриснинг сўзлашича, у 2028 йилдаги сайловларда президентлик учун курашни кўриб чиқмоқда. Шу билан бирга, у ҳозирча якуний қарор қабул қилмаганини таъкидлади. Сиёсатчи сўзларига кўра, бир куни Оқ уйда аёл раҳбар бўлишига ишонч комил.

The Guardian маълумотига кўра, Ҳаррис ҳозирда «107 кун» номли хотиралар китоби тақдимоти билан боғлиқ жаҳон турнесини ўтказмоқда. Китоб номи унинг 2024 йилги президентлик кампанияси давом этган кунлар сонига ишора қилади.

Камала Ҳаррис Демократик партия номзоди сифатида Жо Байден сайловолди пойгадан чекинганидан кейин президентликка чиқди. Аммо сайловларда Доналд Трамп ғалаба қозонди, натижада демократлар Конгресснинг икки палатасида ҳам ўринларни йўқотди.

Сиёсатчи ўз мағлубиятининг сабабларидан бири сифатида республикачиларнинг медиа ҳужумларига етарлича жавоб берилмаганини кўрсатди. Шунингдек, Байденнинг айрим баҳсли баёнотлари ва шахсий хатоларини ҳам тан олди. «Агар мен сўровларга қараб иш тутган бўлсам, бу ерда ўтирмаган бўлардим», — деди у.

Politico нашри  маълумотларига кўра, Ҳаррис келгусида Калифорния губернатори лавозими ёки президентлик сайловларида иштирок этишни режалаштирмоқда. Унинг сўзларига кўра, эҳтимолий рақиблар орасида Гэвин Нюсом, Гретҳен Уитмер, Жей Роберт Прицкер ва Пит Бутижич каби сиёсатчилар бор.