Kim Chen In Shimoliy Koreya davlat ishlari raisi etib qayta saylandi

Shimoliy Koreya yetakchisi Kim Chen In davlat ishlari raisi lavozimiga qayta tayinlandi. U 99,93 foiz ovozi bilan tasdiqlangan, saylovda ishtirok etish darajasi esa 99,99 foiz bo‘lgan. Bu haqda bugun, 23-mart kuni davlatning «KCNA» axborot agentligi bir kun avval chaqirilgan Oliy Xalq Assambleyasining birinchi sessiyasi yakunlariga tayanib xabar berdi.

Pxenyanda bo‘lib o‘tayotgan yig‘ilishda sotsialistik konstitutsiyaga o‘zgartirish va qo‘shimchalar kiritish, shuningdek, Davlat ishlari komissiyasi raisi va boshqa davlat rahbarligi organlarini saylash masalalari muhokama qilinadi. Davlat siyosatini rasman tasdiqlovchi ushbu assambleya odatda hukmron Ishchilar partiyasi qurultoyidan so‘ng partiya qarorlarini qonunga aylantirish uchun yig‘iladi. Shuningdek, yig‘ilishda fevral oyida bo‘lib o‘tgan to‘qqizinchi partiya qurultoyida e’lon qilingan mamlakatning besh yillik iqtisodiy rejasi ham ko‘rib chiqiladi.

Janubga nisbatan siyosat

Yig‘ilish davomida asosiy e’tibor Pxenyan o‘zining Janubiy Koreyaga nisbatan «ikki dushman davlat» siyosatini qonuniylashtirish uchun konstitutsiyani o‘zgartirish-o‘zgartirmasligiga qaratilgan. So‘nggi yillarda Kim Chen In tinch yo‘l bilan birlashish bo‘yicha uzoq yillik maqsadidan voz kechib, Janubni dushman davlat sifatida belgiladi.

Kim Yo Chjonning maqomi

E’tiborli jihati shundaki, Kim Chen Inning singlisi Kim Yo Chjon 2021-yildan buyon faoliyat yuritib kelayotgan mamlakatning eng oliy rahbarlik organi — Davlat ishlari komissiyasi a’zolari ro‘yxatidan joy olmadi. Janubiy Koreya Birlashish vazirligi buning sabablarini o‘rganayotganini ma’lum qildi.

Ammo tahlilchilarning fikricha, bu holat ta’sir doirasining yo‘qotilishini anglatmaydi. Kyonnam universiteti professori Lim El Chulning ta’kidlashicha, uning ro‘yxatda yo‘qligi maqomning pasayishini emas, balki rollarning strategik taqsimlanishini bildiradi. Unga ko‘ra, Kim Yo Chjon hukmron Ishchilar partiyasining bo‘lim boshlig‘i sifatida haqiqiy hokimiyatni o‘z qo‘lida saqlab qolmoqda va partiyada yuqori darajadagi siyosatni muvofiqlashtiruvchi rolni bajarishi mumkin.

Kim Chen In haqida

U 1984-yilning 8-yanvar kuni tug‘ilgan (Janubiy Koreya va G‘arb manbalariga ko‘ra, hozirda u 42 yoshda). Kim Chen In 2011-yilning dekabr oyida, otasi Kim Chen Ir vafotidan so‘ng hokimiyat tepasiga kelgan. O‘sha vaqtda u taxminan 27 yoshda bo‘lib, dunyodagi eng yosh davlat rahbarlaridan biriga aylangan edi. Kim Chen In o‘zining qariyb 15 yillik boshqaruvi davrida mamlakatning harbiy, xususan, yadro va raketa dasturlarini rivojlantirishga asosiy e’tiborni qaratib kelmoqda.