Коррупция бўйича олдинда бораётган Андижон, сертификатсиз ишлаши тақиқланган риэлторлар ва автомобил минган мансабдорларга жазо — 10 август дайжести
Кун давомида Ўзбекистонда юз берган воқеалар ва ҳодисалар, ёритилган янгиликлар ва хабарларнинг энг муҳимларини яна бир бор эсга оламиз.
Ўзбекистонда инглиз ҳуқуқи асосида ишлайдиган рақамли технологиялар маркази ташкил этилади
Сенат «Enterprise Uzbekistan» халқаро рақамли технологиялар марказини ташкил этишни назарда тутувчи конституциявий қонунни маъқуллади. Марказ IT Park ҳудудида фаолият юритади ва унда инглиз ҳуқуқи тамойиллари асосида махсус ҳуқуқий тартиб жорий этилади.
Марказ иштирокчилари учун солиқ ва божхона имтиёзлари, технология ва ускуналарни олиб киришнинг соддалаштирилган тартиби, инвестициялар ҳамда интеллектуал мулкни ҳимоя қилиш кафолатлари белгиланади. Ҳукумат бу орқали Apple, Google, Microsoft ва Amazon каби йирик IT компанияларини жалб қилишни кўзламоқда. 2030 йилгача рақамли хизматлар экспортини 5 млрд долларга, юқори даромадли иш ўринлари сонини эса 300 мингтадан ортиққа етказиш режалаштирилган.
Ўзбекистонда риэлторлар фаолиятини тартибга солувчи қонун қабул қилинди
Ўзбекистонда риэлторлик фаолиятини тартибга солувчи янги қонун қабул қилинди. Унга кўра, риэлторлар малака сертификатига эга бўлиши ва фақат риэлторлик ташкилоти таркибида ишлаши керак. Сертификат 5 йилга берилади, халқаро тан олинган сертификатга эга шахсларга эса миллий сертификат имтиҳонсиз расмийлаштирилади.
Риэлторлик ташкилотлари Ягона реестрга киритилганидан сўнг фаолият юритиши мумкин. Ташкилот раҳбари сертификатга эга бўлиши, штатда камида икки нафар сертификатли риэлтор ишлаши, фуқаролик жавобгарлиги суғурталаниши ва профессионал бирлашмага аъзо бўлиши шарт. Риэлторлар мижозларга кўчмас мулк ва мулкдор ҳақида тўлиқ ва ишончли маълумот бериши, махфийликни сақлаши лозим.
Қонун хусусий секторда «мултлистинг» тизимини жорий этишни ҳам назарда тутади. Янги тартиб 8 ноябрдан кучга киради.
Энг кўп коррупция жиноятлари Андижонда қайд этилган — сенатор
2025 йилда Ўзбекистонда коррупцияга оид жиноятлар учун 7 517 нафар шахс жавобгарликка тортилди. Давлат манфаатларига етказилган зарар 2,9 триллион сўмдан ошган. Энг кўп ҳолатлар Андижонда қайд этилган — 946 нафар. Кейин Тошкент вилояти (793), Қашқадарё (745), Самарқанд (709) ва Наманган (509) келади.
Соҳалар бўйича эса коррупция учун энг кўп жавобгарликка тортилганлар мактабгача ва мактаб таълими тизими ходимлари — 580 нафар. Маҳаллий ҳокимликларда 497, соғлиқни сақлашда 404, тижорат банкларида 245 ва олий таълимда 161 нафар ходим жиноий жавобгарликка тортилган. Сенатор бу кўрсаткичлар коррупция ҳолатларини аниқлаш кучайганини кўрсатишини айтган, бироқ ташкилотлардаги комплаенс-назорат тизимлари самарадорлигини ҳам танқид қилган.
«Автомобилсиз кун»да автомобил минган мансабдорлар жавобгарликка тортилади
10 август куни Ўзбекистонда навбатдаги «Автомобилсиз кун» акцияси ўтказилади. Президент фармонига кўра, акция ҳар ойнинг 10 ва 25 саналарида ташкил этилади. Унинг мақсади автотранспортдан чиқадиган зарарли ташламаларни камайтириш ва жамоат ҳамда экологик тоза транспортдан фойдаланишни рағбатлантиришдан иборат.
Акция доирасида давлат фуқаролик хизматчиларига хизмат ва шахсий автомобилларидан фойдаланмаслик талаби қўйилган. Бу талабни бузган мансабдорлар белгиланган тартибда жавобгарликка тортилиши мумкин.
Фойдаланилмаётган аэродромларни бизнес учун бериш режалаштирилмоқда
Ўзбекистонда кичик ва ҳаваскор авиацияни ривожлантириш учун алоҳида ҳуқуқий тизим жорий этилиши режалаштирилмоқда. Президент қарори лойиҳасига кўра, ҳаво кемаларини рўйхатдан ўтказиш ва сертификатлаш тартиби соддалаштирилади, 115 кг гача бўлган учиш аппаратларини мажбурий рўйхатдан ўтказишдан озод қилиш таклиф этилмоқда.
Лойиҳада фойдаланилмаётган аэродромлар ва учиш-қўниш йўлакларини қайта тиклаб, тадбиркорлар ҳамда лойиҳа ташаббускорларига ижарага бериш ҳам назарда тутилган. Бу объектлар фаол туризмни ривожлантиришда фойдаланилиши мумкин. Ҳозирча қайси аэродромлар қайта тикланиши аниқ эмас.
